Актёрнинг гонорари — унинг даромади бўлиб, ундан камдан кам одам ўз ихтиёри билан воз кечади. Аммо баъзида шундай бўлиши ҳам мумкин, масалан фильмда рол ижро этган актёрларга умуман гонорар берилмайди.
Брэд Питт — “Дедпул-2”
“Дедпул-2” — 2018 йилда суратга олинган машҳур фильмлардан бири. Лойиҳада Райан Рейнолдс, Жош Бролин ва Зази Бецдан ташқари бошқа таниқли актёрлар рол ўйнаган. Эпизодик ролларда Метт Деймон, Билл Скарсгард ва ҳатто Брэд Питтни ҳам кўриш мумкин. Маълум бўлишича, Брэд Питт “Дедпул-2”даги ролини бир чашка қаҳва учун ўйнаган. Аммо актёр шарт қўйган: Райан Рейнолдс унга ичимлик олиб келсагина, у рози бўлади. Кейинчалик Рейнолдс тан олганидек, бундай шарт Питтнинг текинга ишлаши ҳам мумкинлигини ҳаммага билдириш учун энг зўр вариант эди.
Брюс Уиллис — “Тўрт хона”
1995 йилда “Тўрт хона” комедиясининг премьераси бўлиб ўтди. Лойиҳада кўплаб машҳур Голливуд актёрлари рол ўйнаган. Қизиғи, Брюс фильмда текинга ўйнашни хоҳлайди ва шундай қилади ҳам. Аммо унинг номи титрларга киритилмайди, чунки актёр бу ҳаракати билан ўзи аъзо бўлган Америка киноактёрлари гилдиясининг қоидаларидан бирини бузган. Қоидага кўра, фильмдаги барча ролларга гонорар тўланиши керак.
Жонни Депп, Жуд Лоу, Колин Фаррелл — “Доктор Парнас хаёлоти”
“Доктор Парнас хаёлоти” фильми томошабинлар хотирасида фожиа сифатида қолган: бош рол ижрочиси Хит Лежер суратга олиш вақтида оламдан ўтган. Актёр бош ролни ўйнаган, шунинг учун фильм тақдири шубҳа остида қолганди.
Аммо режиссёр суратга олишни давом эттиришга қарор қилади ва бир вақтнинг ўзида бир нечта Голливуд юлдузлари — Жонни Депп, Жуд Лоу, Колин Фарреллни таклиф қилади. Учаласи ҳам фильмда нафақат рол ўйнаган, балки гонорардан ҳам воз кечган: пул Хит Лежер қизининг ҳисоб рақамига ўтказилган.
Марк Уолберг — “Жангчи”
Марк Уолберг — кўплаб қизиқарли фильмларда иштирок этган истеъдодли актёр. Маркнинг сўзларига кўра, “Жангчи” драмаси у орзу қилган лойиҳа эди ва актёр лойиҳада рол ўйнаш учун гонорардан бош тортди ва маблағнинг ҳаммасини мураббийларга берди. У узоқ вақт давомида ролга тайёрланди ва охирида ўзи кутган натижага эришди. Эътиборлиси, уринишларга қарамай, ҳамма ҳам “Жангчи” лойиҳасини қадрламади, фильм танқидларга сабаб бўлди. Бироқ, бу Марк Уолбергга зарар келтирмади.
Ранвир Сингх — “Феннини излаб”
Ранвир Сингх — машҳур Болливуд актёрларидан бири. У кино оламга кириб келган йиллари ўзига берилган барча ролларни маҳорат билан ижро этди ва кейинчалик машҳур фильмларда суратга туша бошлади. Актёр “Феннини излаб” фильмида томошабинлар кўз ўнгида ўзгача ампулада пайдо бўлди. Актёр ўз характерининг образини ўйлаб топганига қўшимча равишда, ижроси учун берилган гонорарни ҳам олмади. Ранвир шунчаки лойиҳада кўринишни ва кичик бўлсада янги рол билан мухлисларни хурсанд қилишни хоҳлади. Ёрқин рангли костюм ва грим туфайли мухлислар бу ғалати қаҳрамонни севимли актёри сифатида тан олмади.
Ребекка Холл ва Тимоти Шаламе — “Нью-Йоркдаги ёмғирли кун”
2020 йилда Вуди Аллен ўзининг навбатдаги фильмини тақдим этди. “Нью-Йоркдаги ёмғирли кун” романтик комедияси танқидчилардан асосан ижобий баҳо олган. Актёрлар шунчаки ажойиб эди: Тимоти Шаламе, Эл Феннинг, Жуд Лоу, Ребекка Холл ва қўшиқчи Селена Гомес. Эътиборли жиҳати, Ребекка ва Тимоти ушбу фильмдаги гонорарларидан воз кечиб, пулларни хайрия ишларига берган.
Брюс Уиллис — “Дўстлар”
1994 йилда Американинг машҳур “Дўстлар” сериалининг биринчи қисми чиқди. Лойиҳа бошланишида бош ролни ижро этган актёрлар унчалик таниқли бўлмаган бўлса, бир оз вақт ўтиб улар ҳақиқий юлдузга айланди. Кейинчалик лойиҳада нафақат машҳур хонандалар, балки актёрлар ҳам суратга туша бошлади. Брюс Уиллис улардан бири эди. Мухлисларнинг фикрича, актёр Меттью Перри билан келишмовчилик туфайли сериалда рол ижро этган ва бир нечта эпизодлар учун гонорар олмаган. Аслида, Брюс Уиллис барча пулларини хайрия ишларига сарфлаган.
Изоҳ (0)