Актёрнинг гонорари — унинг даромади бўлиб, ундан камдан кам одам ўз ихтиёри билан воз кечади. Аммо баъзида шундай бўлиши ҳам мумкин. Мисол учун, Приянка Чопра ва Карина Капур «Биллу» фильми учун бир тийин ҳам олмаган, Брюс Уиллис ва Жонни Депп эса гонорарларини хайрия ишларига берган.
Ребекка Холл ва Тимоти Шаламе — «Нью-Йоркдаги ёмғирли кун»
«Нью-Йоркдаги ёмғирли кун» романтик комедияси танқидчилардан асосан ижобий баҳо олган. Актёрлар шунчаки ажойиб эди: Тимоти Шаламе, Эл Феннинг, Жуд Лоу, Ребекка Холл ва қўшиқчи Селена Гомес. Эътиборли жиҳати, Ребекка ва Тимоти ушбу фильмдаги гонорарларидан воз кечиб, пулларни хайрия ишларига берган.
Брэд Питт — «Дедпул-2»
«Дедпул-2»даги ролини Брэд Питт бир чашка қаҳва учун ўйнаган. Аммо актёр шарт қўйган: Райан Рейнолдс унга ичимлик олиб келсагина, у рози бўлади. Кейинчалик Рейнолдс тан олганидек, бундай шарт Питтнинг текинга ишлаши ҳам мумкинлигини ҳаммага билдириш учун энг зўр вариант эди.
Ален Делон — «Янги йилингиз билан, оналар!»
Ален Делон жаҳон киносининг таниқли юлдузи. Ўтган йили актёр 86 ёшга тўлди, аммо сўнгги йилларда рол ўйнамай қўйди. 2012 йилда Делон тўсатдан «Янги йилингиз билан, оналар!» комедиясида пайдо бўлди. Маълум бўлишича, у фильмдаги роли учун бир тийин ҳам олмаган. Актёр онага муҳаббат энг кучли туйғу эканини, бу ҳақдаги фильм учун пул олиш ноўрин бўлишини айтган.
Жонни Депп, Жуд Лоу, Колин Фаррелл — «Доктор Парнас хаёлоти»
«Доктор Парнас хаёлоти» фильми томошабинлар хотирасида фожиа сифатида эсда қолган: бош рол ижрочиси Хит Лежер суратга олиш вақтида оламдан ўтган. Актёр бош ролни ўйнарди, шунинг учун фильм тақдири шубҳа остида қолганди.
Аммо режиссёр суратга олишни давом эттиришга қарор қилади ва бир вақтнинг ўзида бир нечта Голливуд юлдузлари — Жонни Депп, Жуд Лоу, Колин Фарреллни таклиф қилади. Учаласи ҳам фильмда нафақат рол ўйнаган, балки гонорардан ҳам воз кечган: пул Хит Лежер қизининг ҳисоб рақамига ўтказилган.
Приянка Чопра ва Карина Капур — «Биллу»
Приянка Чопра — энг кўп маош оладиган машҳур юлдузлардан бири. У Болливуд юлдузи ва «Дунё гўзали—2000» танлови ғолиби. 2009 йилда актриса «Биллу» фильмида текинга рол ўйнайди. Карина Капур ҳам шундай қилади. Иккала актриса ҳам иш ҳақидан воз кечиб, юборилган чекларни қайтариб беришган.
Брюс Уиллис — «Тўрт хона»
«Тўрт хона» — 1990 йилларнинг комедик фильми. Ушбу фильмнинг актёрлар жамоасига фақат ҳавас қилиш мумкин: Тим Рот, Антонио Бандерас, Валерия Голино, Мадонна ва Брюс Уиллис. Қизиғи, Брюс фильмда текинга ўйнашни хоҳлайди ва шундай қилади ҳам. Аммо унинг номи титрларга киритилмайди, чунки актёр бу ҳаракати билан ўзи аъзо бўлган Америка киноактёрлари гильдиясининг қоидаларидан бирини бузган. Қоидага кўра, фильмдаги барча ролларга гонорар тўланиши керак.
Мавзуга доир:
- Биргина омадсиз роли туфайли томошабинлар назаридан қолган Голливуд актёрлари (фото)
- Фильмдаги бир хил образни маҳорат билан гавдалантирган, бироқ рол учун турлича гонорар олган актёрлар (фото)
- 2021 йилда энг кўп пул ишлаб топган жаҳон киноси юлдузлари (фото)
- Уларнинг кунлик гонорарини бошқалар бир ойда топади: Ўзбек киносининг «энг қиммат» актрисалари рейтинги (фото)
Изоҳ (0)