1992 йилда суратга олинган Уитни Ҳьюстон ва Кевин Костнер иштирокидаги “Тансоқчи” фильми қайта суратга олинади.
Лойиҳага режиссёрлик қилишни Билли Айлиш ва BTS ҳақидаги ҳужжатли фильмлари билан танилган Сем Ренч ўз зиммасига олган, сценарийни эса “Иккинчи рақамли суд ҳайъати” фильмининг муаллифи Жонатан Абрамс ёзмоқда. Ҳозирча драма ёзувчиси ва “Тони” мукофоти совриндори Метю Лопес жамоада қоладими ёки йўқми номаълум.
Эслатиб ўтамиз, оригинал фильмда саҳна юлдузи Рейчел Маррон ва қўшиқчини таъқибчилардан ҳимоя қилиш учун ёлланган собиқ махсус хизмат агенти Франк Фармер ҳақида ҳикоя қилинган. Романтика, саргузашт ва, албатта машҳур саундтрек фильмни танқидчиларнинг совуқ кутиб олинишига қарамай, абадий классикага айлантирди. I Will Always Love You va I Have Nothing қўшиқлари ҳозир ҳам миллионлаб одамларнинг қалбида жаранглайди.
Шу ўринда қизиқарли факт: ушбу машҳур фильмнинг давоми 90 йилларда суратга олиниши режалаштирилган ва унда марҳум малика Диана рол ўйнаши мумкин эди. Кевин Костнер ҳатто уни назарда тутиб сценарий ёзган, аммо қироллик оиласи аъзосининг фожиали ўлимидан сўнг лойиҳа тўхтатилган.
Изоҳ (0)