“Титаник” 1912 йил 14 апрелдан 15 апрелга ўтар кечаси чўкиб кетган. Афсонавий кеманинг ҳалокатга учраганига 113 йил тўлиши муносабати билан Роуз ва Жекнинг тақдири каби ҳайратланарли бўлган ҳақиқий севишган жуфтликлар ҳақида эслашга қарор қилдик.
Режиссёр Жеймс Кемероннинг айтишича, бу персонажлар тўқиб чиқарилган. Бироқ фильм қаҳрамонларига асос бўлиши мумкин бўлган ҳақиқий одамларнинг севги тарихлари ҳам бор.
“SOS!” ҳайқириғи остида турмуш қуриш таклифи
“Титаник” йўловчилари орасида машҳур теннисчи Карл Бер ва унинг севгилиси Ҳелен Ньюсом ҳам бор эди. Газеталарнинг ёзишича, айнан ўша машъум кечада Карл Ҳеленга турмуш қуришни таклиф қилган. Қиз бадавлат оиладан бўлиб, онаси қизи учун ўзи тенги бой куёв топилишини орзу қиларди.
Ҳелен теннисчига кўнгил қўйганда онаси бунга қарши чиқади. Қизини чалғитиш мақсадида уни Европа бўйлаб саёҳатга олиб кетади. Бироқ қайсар Карл ҳам севгилисининг изидан қолмай эргашади. Ҳеленнинг “Титаник”да Америкага қайтаётганини эшитгач, у ҳам ўша кемага чипта харид қилади.
Тўқнашув юз берганда спортчи каютага югуриб, аёлларни қайиқ палубасига олиб чиқади. “Уайт Стар Лайн” компанияси раҳбари Брюс Исмей шахсан Карлга қайиқдан жой таклиф қилганда, севишганлар абадий хайрлашишга тайёр эди. Бир йил ўтгач, Карл ва Ҳелен турмуш қуришади, уларнинг учта ўғли ва бир қизи дунёга келади.
Чўкиб кетган тўй совғалари
1912 йил 21 апрелда, фалокатдан олти кун ўтгач, The New York Times газетасида Эдвард ва Этел Бинларнинг тарихи эълон қилинади. Фалокатдан бир неча йил олдин тош терувчи Эдвард Америкага кўчиб келган, хизматкор бўлиб ишлайдиган қаллиғи Этел эса Англияда қолган эди. Улар ўз ватанларида никоҳдан ўтиб, бир ойдан сўнг эр хотинини янги уйига олиб кетади.
Улар “Титаник”да иккинчи даражали йўловчилар сифатида саёҳат қилишаётган эди. Кема ҳалокатга учраганда Эдвард хотинини қутқарув қайиғига ўтқазишга ёрдам беради, аммо “Фақат аёллар!” деган ҳайқириқларни эшитиб, ўзи орқага чекинади. Бироқ қайиқ узоқлашгач, унинг ярми бўш эканлигини кўриб, ўзини сувга ташлайди. Этел эрини қайиққа тортиб олади. Бинлар оиласининг барча мол-мулки, жумладан, 65 та тўй совғаси ҳам сув қаърига чўкиб кетади, аммо ўзлари тирик қолишади.
Фожиадан туғилган фарзанд
Элен Уокер айсберг билан тўқнашувдан олдинги кечада ҳомила сифатида пайдо бўлганига ишонади. “Бу мен учун жуда муҳим”, деганди у суҳбат чоғида. Унинг ота-онаси Англияда заргарлик дўконининг эгаси бўлган 39 ёшли Сэмюэл Морли ва унинг ишчиларидан бири — 19 ёшли Кейт Филлипс эди. Бир муддат олдин улар ўртасида севги пайдо бўлган ва Морлининг хотини ҳамда 12 ёшли қизи борлигига қарамай, Сэмюэл оиласини тарк этиб, Кейт билан Америкага жўнашга қарор қилганди. У ерда улар янги ҳаёт бошлашлари мумкин эди.
Улар “Титаник”ка мистер ва миссис Маршалл сифатида сохта фамилия билан чиқишади. Фожиа юз берганда Кейт қутқарув қайиғига ўтиради. Сэмюэл унинг ортидан сувга сакрайди, бироқ сузишни билмагани учун чўкиб кетади.
Севгилисидан хотира сифатида Кейтда унга саёҳат пайтида совға қилинган сапфир маржон қолади. 1913 йил 11 январда эса у қиз фарзанд кўради.
Элен умр бўйи туғилганлик гувоҳномасига Сэмюэл Морлининг исми ёзилиши учун ҳаракат қилади, аммо бунга эришолмайди. У 2006 йилда вафот этади. Сўнгги васиятига кўра, унинг кули денгизга сепилади: у шундай қилиб отаси билан бирлашишни истарди. Эленни яхши билган “Титаник” тадқиқотчиси Син Шмелцнинг таъкидлашича, айнан унинг ота-онаси тарихи, шунингдек, маржон воқеаси фильм ижодкорларини илҳомлантирган.
“Сен қаерда бўлсанг, мен ҳам ўша ерда бўламан”
“Титаник” кемаси биринчи классида машҳур тадбиркор Исидор Штраус рафиқаси Ида билан саёҳат қилаётган эди. У Американинг энг йирик дўконлари тармоғининг ҳамтаъсисчиларидан бири эди. Штрауслар 40 йилдан бери эр-хотин бўлиб, ҳар бир ишда ҳамкор эдилар: Ида Исидорга бизнесда ва конгрессменлик фаолиятида ёрдам берарди, Исидор эса унга уй юмушлари ва хайрия ишларида кўмаклашарди. Улар “Титаник”да Германиядан уйларига қайтишаётган эди. Гувоҳларнинг сўзларига кўра, кема зобити Штрауслар жуфтлигига қутқарув қайиғига ўтиришни таклиф этганда Исидор кемада қолаётган бошқа эркакларнинг тақдирини баҳам кўришга қарор қилиб, бу таклифни рад этган.
Эри Идани қайиққа ўтқизмоқчи бўлганда у шундай дейди: “Сен қаерда бўлсанг, мен ҳам ўша ерда бўламан. Биз ҳар доим бирга бўлганмиз, бирга ўламиз ҳам”. Эри унга болаларни ўйлашини айтади, аммо Ида: “Улар тушунишади”, деб жавоб беради ва худди фильмдаги Роуз сингари палубага сакраб чиқади. Штрауслар ўз ўринларига оқсочларини қайиққа ўтқазишади. Исидорнинг жасади никоҳ узугидан аниқланади, Иданинг жасади эса топилмайди.
Изоҳ (0)