Хитой олтита Шиян-27 сунъий йўлдошини қуёш билан синхрон орбитага муваффақиятли олиб чиқди. Бу ҳақда Хитой аэрокосмик фан ва технология корпорацияси (CASC) маълум қилди.
Учириш Пекин вақти билан 06:51 да Тайюан космодромидан CZ-6A (Changzheng-6-ei) ракетаси ёрдамида амалга оширилди. Бу Long March серияли ракета учун 570-парвоздир.
CASC маълумотларига кўра, учирилган сунъий йўлдошлар биринчи навбатда космик муҳитни ўрганиш ва тегишли технологик тажрибаларни ўтказиш учун ишлатилади.
Ўзгартирилган икки босқичли CZ-6А ракетаси узунлиги 50 м бўлиб, керосин ва суюқ кислород аралашмаси бўлган экологик тоза ёқилғида ишлайди. Ракета Шанхай космик парвозлар технологиялари академияси томонидан CASC билан ҳамкорликда ишлаб чиқилган бўлиб, тўртта қаттиқ ёнилғи кучайтиргич билан жиҳозланган ва тахминан 6,5 тонна фойдали юкни қуёш билан синхрон орбитага (500 км) олиб чиқишга қодир.
CZ-6 дан фарқли ўлароқ, у кенгайтирилган биринчи босқичга эга, унинг диаметри иккинчиси билан бир хил — 3,35 м. Ушбу турдаги ташувчилар учун бу 26-миссия бўлиб, 2025 йилдаги учинчи парвоз ҳисобланади.
Изоҳ (0)