Burger King фастфуд ресторанлари тармоғи Ўзбекистонда фаолият бошлаши кутилмоқда. Бу ҳақда президент раислигида ўтказилган видеоселектор йиғилишида International Beverages Ташкент салқин ичимликлар ишлаб чиқарувчи корхонаси асосчиси Шуҳрат Эргашев айтиб ўтди.
Унинг айтишича, компания мамлакатда Burger King ресторанларини очиш учун лицензия олган.
Биз 10 йил аввал Burger King ҳамда McDonald’s каби брендлар орқасидан чопиб, уларга “Ўзбекистонга келинглар, илтимос” дегандик. Ҳозирги кунда улар билан келишиб, Ўзбекистонга лицензиясини олдик. 2-3 ойда Burger King компанияси очилади, дейди Шуҳрат Эргашев.
Таъкидланишича, Burger King марказий офисини Тошкентда ташкил қилиб, Марказий Осиёга лицензия беришни таклиф қилган.
Ушбу компаниялар нима учун катта аҳамиятга эга? Чунки бошқа инвесторлар бирор давлатга кирган вақтда Burger King ёки McDonald’s борми деб қарайди. Улар учун бу белги ҳисобланади, дея қўшимча қилган тадбиркор.
Burger King 1954 йилда АҚШда ташкил топган. Гамбургерларга (асосан вопперлар) ихтисослашган тез овқатланиш ресторанлари тармоқлари орасида дунёда иккинчи ўринда туради.
2021 йилнинг июль ойида Burger King Ўзбекистон бозорига кираётгани ҳақида хабар берилган эди. Тошкентда биринчи филиал 2021 йилнинг охиригача очилиши режалаштирилаётгани, лекин пандемия бунга таъсир ўтказиши мумкинлиги айтилганди.
Изоҳ (0)