Жорий йилнинг 15 апрель куни “Ўзсаноатқурилишбанк” АТБ ва Тошкентдаги Сингапур менежментни ривожлантириш институти ҳамкорлигида “Яшил иқтисодиётга ўтиш: муаммолар ва истиқболлар” мавзусида халқаро илмий-амалий конференция бўлиб ўтди. Ушбу тадбир Ўзбекистон Республикасида 2025 йил — Атроф-муҳитни муҳофаза қилиш ва Яшил иқтисодиёт йили деб эълон қилинган Давлат дастури доирасида ташкил этилди.
Унинг асосий мақсади — барқарор иқтисодий ривожланиш масалалари бўйича халқаро тажрибани ўрганиш, долзарб ечимларни муҳокама қилиш ва профессионал мулоқот майдони яратишдан иборат бўлди. Конференцияда дунёнинг турли мамлакатларидан келган экспертлар, молиявий ташкилотлар ва тадқиқот марказлари вакиллари иштирок этди.
Иштирокчилар орасида Жаҳон банки, Осиё ва Европа тикланиш ва тараққиёт банклари, Франциянинг Тараққиёт агентлиги (АFD), Яшил ўсиш бўйича Глобал институт (GGGI), шунингдек, халқаро рейтинг агентлиги Fitch Ratings, халқаро аудит ва консалтинг компанияси PricewaterhouseCoopers (PwC), ҳамда сифат ва хавфсизлик стандартларини баҳолаш бўйича хизмат кўрсатувчи Bureau Veritas компанияси каби ташкилотлар ҳам иштирок этди.
Конференция доирасида иқлим ва яшил молия, айланма иқтисодиёт, қайта тикланувчи энергетика каби масалалар билан бирга, корпоратив ижтимоий жавобгарлик, атроф-муҳитга таъсирни баҳолаш, ишлаб чиқаришда шаффофлик ва масъулиятни таъминлашга қаратилган халқаро тамойиллар (ESG) тўғрисида ҳам фикр алмашилди.
Шунингдек, маҳсулот ва хизматларни сифат, хавфсизлик ҳамда экологик талабларга мувофиқлигини тасдиқлайдиган (ISO) тизими доирасидаги стандартларни жорий этиш борасида халқаро тажрибалар тақдим этилди.
Реклама ҳуқуқи асосида.
Изоҳ (0)