Мусиқа — бу бутун дунё тушунадиган тил. Кўплаб санъаткорлар учун бунинг ўзи етарли эмас: улар қўшиқларини турли тилларда ижро этиб, нафақат тингловчилар юрагига йўл топади, балки маданиятлар ўртасида кўприк вазифасини ҳам бажаради. Қуйида бир нечта тилларда қўшиқ куйлайдиган ва ҳатто альбомлар чиқарган иқтидорли хонандалар ҳақида сўз юритамиз.
Шакира — испан, инглиз ва араб тиллари
Колумбиялик хонанда Шакира хорижий тилларни билиш халқаро муваффақият сари йўл очишини амалда исботлади. У лотин америкалик қўшиқчи сифатида карьерасини бошлаган ва тез орада нафақат Колумбияда, балки АҚШда ҳам тингловчилар қалбини забт этган.
1991 йилда испан тилида чиққан илк альбоми унга катта муваффақият келтирди. Бироқ глобал жиҳатдан машҳур бўлиш учун у инглиз тилини ўрганиши керак эди. Тўрт йил давом этган машаққатли машғулотлар ва грамматикани чуқур ўрганиш натижасида Шакира инглиз тилида таржимонсиз қўшиқлар ёзишга муваффақ бўлди.
Бугунги кунда Шакирани бемалол шоу-бизнесдаги асосий полиглотлардан бири, деб аташ мумкин. У олтита тилда сўзлаша олади. Испан ва инглиз тилидан ташқари қўшиқчи араб, португал, француз ҳамда италян тилларини билади.
Селин Дион — француз ва инглиз тиллари
Селин Дион икки тилда — француз ва инглиз тилида куйлайди. Бу унинг карьерасидаги турли босқичлар билан боғлиқ. Дион 80 йилларда француз тилида куйловчи сифатида танилган, сўнг 90 йилларнинг бошларида инглиз тилига ўтиб, Uinson, Celine Dion ва The Colour of My Love каби альбомларни чиқарди.
Селин Дионнинг айтишича, у инглиз ва француз тилларида турлича куйлайди — бу фақат талаффуз масаласи эмас. Унга кўра, француз тили нозик туйғулар ва аниқ ифодаларни талаб қилади, шунинг учун бу тилда куйлаш инглиз тилига қараганда мураккаброқ саналади. Бундан ташқари, хонанда испан, италян, хитой ва япон тилларида ҳам қўшиқлар айтган.
Росалия — испан, инглиз ва каталан тиллари
Янги авлоднинг энг ёрқин қўшиқчиларидан бири бўлган Росалия ҳам полиглот хонанда. У Барселона яқинидаги шаҳарчада улғайган, бу ерда испан ва каталан тилларида сўзлашади.
Росалия инглиз тилида эркин мулоқот қилса-да, аксарият қўшиқларини испан тилида куйлайди, чунки шу орқали ўз халқининг маданияти ва ҳис-туйғуларини етказишни истайди. Аммо унинг ижодида она тили — каталан тилининг ҳам ўрни беқиёс. 2019 йилда у “Милионàриа” номли қўшиқ айтиб, илк бор тўлиқ каталан тилида куйлади ва шу билан ўз аждодлари ва ватанига бўлган ҳурматини ифода этди.
Леди Гага — француз, немис ва испан тиллари
Леди Гага айтишича, турли тилларда куйлаш бу шунчаки ижодий тажриба эмас: бир нечта тилда қўшиқ айтиш мусиқа оҳангига ўзгача романтик тус беради, ва трекни бойитади. У Poker Face қўшиғининг французча версияси, Scheiße номли немисча трек ва Americanо қўшиғининг испанча версиясини ҳам мухлисларига тақдим этган.
Билли Айлиш — Bad Guy’нинг японча версияси ва испан тилидаги тажрибалар
Америкалик қўшиқчи Билли Айлиш полиглот бўлмаса-да, турли тилларда ҳит қўшиқларини ижро этиш орқали мухлисларини ҳайратда қолдиришни билади. Унинг аксарият қўшиқлари инглиз тилида, аммо у турли тиллар ва маданиятлар билан тажриба ўтказишдан қўрқмайди.
Қўшиқлари орасида Bad Guy’нинг японча версияси алоҳида эътиборга лойиқ. Мазкур трек Японияда рейтингларда юқори ўринларни эгаллади, мухлислар эса уни илиқ кутиб олишди. Бундан ташқари, 2021 йилда Билли машҳур Euphoria сериалининг махсус эпизоди учун испан тилида саундтрек ёзди.
Изоҳ (0)