Турк сериаллари гўзал актёрлари, қизиқарли сюжетлари ва ёрқин локацияси туфайли бутун дунёдаги миллионлаб томошабинлар қалбини забт этган. Бироқ уларнинг кўплаб мухлислари эътиборсиз қолдира олмайдиган камчиликлари ҳам мавжуд.
Ҳаддан ташқари узоқ давом этадиган сериаллар
Турк сериалининг ўртача бир қисми тахминан 2 соат давом этади. Агар онлайн томоша қилинса, рекламалари билан бирга 3,5 соатгача чўзилиши мумкин.
Бундан ташқари, турк сериаллари кўпинча ўнлаб, ҳатто юзлаб қисмлардан иборат бўлади. Масалан, “Муҳташам юз йил” ва “Ҳукмдор Усмон” бир неча мавсумга чўзилади. Воқеаларнинг чўзилиши баъзан сюжет сусайишига олиб келади.
Бир хил қолипдаги сюжетлар
Кўплаб турк сериалларида такрорланувчи сюжет чизиқларини кўриш мумкин:
- бой йигит-камбағал қиз;
- сохта никоҳлар;
- бир кўришдаёқ севги;
- душманларнинг дўстга айланиши.
Масалан, “Қизил шарбат”да қаҳрамонлар муносабатларни қайта-қайта тиклашга уринишади, “Қўрғон сирлари”нинг учинчи мавсумида эса ўтмишдаги қасоскорлар пайдо бўлади. Бундай бир хиллик ҳатто турк сериалларининг энг содиқ мухлисларини ҳам зериктиради.
Тугалланмаган ҳикоялар ва кутилмаган якунлар
Бу муаммо икки жиҳатни ўз ичига олади:
Сериалларнинг кутилмаганда тўхтатилиши. Рейтинги юқори ва машҳур актёрлар қатнашган лойиҳалар ҳам тўсатдан бекор қилиниши мумкин.
Тугалланмаган сюжет линиялари. Баъзан мантиқий якунига етган сериалларда ҳам айтилмай қолган нуқталар бўлади, айниқса, иккинчи даражали қаҳрамонлар тақдирида.
Ҳаддан ташқари цензура
Туркия ҳукумати РТУК махсус органи орқали телевидениени қаттиқ назорат қилади. Натижада сериаллар қуйидаги қаттиқ чекловларга учрайди:
- очиқ саҳналарни кўрсатиш тақиқланган;
- ҳатто енгил романтика ҳам цензурага учрайди;
- отишма ёки жиноят саҳналари қисқартирилади.
“Қизил шарбат”, “Чуқур” ва “Қалбим эшигини қоқ” каби кўплаб лойиҳалар жаримага тортилган ва вақтинча эфирдан олиб ташланган. Шу сабабли сериалларда сюжет динамикасида кўплаб бўшлиқлар ва узилишлар пайдо бўлади.
Актёрлар монополияси
Турк кино бизнесида бош ролларда доимо бир хил юлдузлар суратга олинадиган вазият юзага келган. Бу бир томондан томошабинларни жалб этса, бошқа томондан ёш актёрларга ўзларини намоён қилиш имконияти деярли берилмаяпти.
Бундан ташқари, машҳур юлдузларнинг мухлислари билан бир қаторда, улар иштирок этган сериалларни атайлаб кўрмайдиган танқидчилари ҳам бор. Бу ҳолат рейтингларга салбий таъсир кўрсатмоқда ва ишлаб чиқарувчиларни асосий таркибга камроқ танилган актёрларни тобора кўпроқ жалб этишга мажбур қилмоқда.
Изоҳ (0)