Дональд Трамп Россиядан урушни якунлаш бўйича музокараларни тезроқ бошлашни талаб қилди. АҚШ президенти бу ҳақда ўзининг Truth Social тармоғида маълум қилди. Баёнотда айтилишича, можаронинг ҳафталик қурбонлари мингдан ошади.
“Россия ҳаракатга ўтиши керак. Жуда кўп одам ўляпти — ҳар ҳафтада минглаб қурбонлар”, деб ёзди Трамп.
Ушбу баёнот Трампнинг махсус вакили Стив Уиткофф Россияга келиб, Владимир Путин билан учрашувни бошлашидан бир оз олдин эълон қилинди. Маълумотларга кўра, у Россия раҳбари билан сулҳ шартларини муҳокама қилади.
Қайд этилишича, Трамп вакили мазкур учрашувдан олдин Россиянинг халқаро иқтисодий ҳамкорлик бўйича вакили, шунингдек, Россия Тўғридан-тўғри инвестициялар жамғармаси раҳбари Кирилл Дмитриев билан мулоқот қилган.
Axios нашрига кўра, Трамп маъмурияти Россияни огоҳлантириб, Кремль сулҳга рози бўлмаган тақдирда апрель ойи охирига қадар янги санкциялар жорий қилиниши мумкинлигини билдирган. Трамп эса, ўз навбатида, Россиянинг Украинага босқинини “бемаъни ва даҳшатли уруш” деб атаган.
АҚШ ва Россия ўртасида маҳбуслар алмашинуви
Бугун, 11 апрель куни Вашингтон ҳамда Москва расмийлари Бирлашган Араб Амирликларининг Абу-Даби шаҳрида маҳбуслар алмашинувини ўтказди. РФ АҚШ–Россия фуқароси Ксения Карелинани озод қилган. АҚШ эса 2023 йили Кипрда ҳибсга олинган ҳамда Германия ва Россия паспортларига эга Артур Петровни русларга топширди. Петров Қўшма Штатларда ишлаб чиқарилган микроэлектроника воситаларини ноқонуний экспорт қилишда гумонланаётганди.
Трамп маҳбуслар алмашинуви ортидан Карелинанинг миннатдорлик билдирган видеосини ўзининг Truth Social саҳифасида эълон қилиб, “Уйга қайтганингдан хурсандмиз”, деб ёзди.
Изоҳ (0)