Apple компанияси АҚШ президенти жорий этган янги божхона тарифларидан қочиш учун Ҳиндистонда ишлаб чиқарилган 600 тоннага яқин iPhone смартфонларини юк самолётлари орқали Қўшма Штатларга жўнатди. Хабар берилишича, бу жуда шошилинч амалга оширилган.
Манбаларга кўра, Apple ўзининг энг йирик бозорларидан бири ҳисобланган АҚШда маҳсулотлар захирасини ошириш учун бу стратегияни танлаган. Компаниянинг асосий ишлаб чиқариш базаси Хитойда жойлашган, бироқ Apple 145 фоизлик бож тўловларидан қочишга ҳаракат қилмоқда. Шу билан бирга, Ҳиндистондан олиб келинадиган маҳсулотларга белгиланган 26 фоизлик бож ҳам компания раҳбариятини қониқтирмаяпти.
Хабар қилинишича, Apple бунинг учун март ойидан буён ҳар бири 100 тонна сиғимга эга олтита юк самолётини жалб қилган. Улардан бири эса бу ҳафта, янги бож тарифлари кучга киришидан олдин АҚШга учиб кетган.
Компания раҳбарияти Ҳиндистондаги Тамил Наду штатида жойлашган Ченнай аэропортида махсус тезлаштирилган “яшил коридор” ташкил этишни сўраган. Бу орқали маҳсулотларни божхона расмийлаштирувидан ўтказиш муддати 30 соатдан 6 соатгача қисқартирилган. Мазкур тизим Apple’нинг Хитойдаги айрим аэропортларда қўллайдиган моделига ўхшайди.
Reuters ҳисоб-китобларига кўра, қадоқланган iPhone 14 ва унинг зарядловчи қурилмаси ўртача 350 граммни ташкил қилади. Шундан келиб чиқса, 600 тонналик юк тахминан 1,5 миллион дона iPhone’га тўғри келади.
Apple ҳар йили дунё бўйлаб 220 миллиондан ортиқ iPhone сотади. Counterpoint Research таҳлилларига кўра, ҳозирда АҚШда сотилаётган iPhoneъларнинг 20 фоизи Ҳиндистондан, қолганлари эса асосан Хитойдан импорт қилинади.
Трамп бошчилигидаги маъмурият Хитойдан келтириладиган маҳсулотларга бож тарифларини кетма-кет ошириб бормоқда. Бунинг натижасида iPhone нархлари уч баробаргача қимматлаши мумкинлиги айтилмоқда.
Изоҳ (0)