Тошкент шаҳрида 15 январдан 15 февралгача “Хавфсиз ва соғлом пойтахт” комплекс махсус тезкор-профилактик тадбирлар ойлиги ўтказилди. Бу ҳақда пойтахт ИИББ матбуот хизмати хабар берди.
Маълум қилинишича, ойлик давомида ташкил этилган махсус гуруҳлар томонидан жами 801 та гиёҳвандлик воситалари, психотроп моддалар ва кучли таъсир қилувчи воситаларнинг ноқонуний муомаласи билан боғлиқ ҳолатлар аниқланди. Улар бўйича 567 та жиноят иши қўзғатилди, 158 та маъмурий баённомалар расмийлаштирилди, 76 та ҳолат бўйича терговга қадар текширув ҳаракатлари олиб борилмоқда.
Кўрилган тезкор чора-тадбирлар натижасида жами 21 кг 818 гр гиёҳвандлик воситалари, 28 790 та кучли таъсир “Прегабалин” дори воситалари ноқонуний муомаласига чек қўйилди ва минглаб инсонларнинг заҳарланиши олди олиниб, ҳаёти сақланиб қолинди.
Гиёҳвандлик воситаларини яшириш усули орқали тарқатувчилар билан боғлиқ 34 та ҳолат аниқланиб, унинг натижасида 9 кг 538 гр ноқонуний гиёҳвандлик моддалари ҳамда 3 689 дона кучли таъсир қилувчи дори воситаларининг ноқонуний муомаласи тўхтатиб қолинди.
Ўтказилган тезкор-қидирув тадбирлари натижасида жами 160 нафар қидирувдаги шахслар ушланди, 45 нафар бедарак йўқолганлар аниқланиб яқинларига қайтарилди. Ўткир тиғли буюмларни қонунга хилоф равишда олиб юрган 2 181 нафар фуқаролар аниқланиб тегишли тартибда маъмурий баённомалар расмийлаштирилди.
Тезкор тадбирлар давомида 1 та жанговар (ПМ), 21 та пневматик қурол ва 7 та ўқотар ов милтиғи ҳамда 14 дона ўқ-дорилар ноқонуний муомаладан олинди. Ҳар бир ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Олиб борган тадбирлар натижасида олдини олиш мумкин бўлган жиноятчилик 43 фоизга камайди. Шундан, фирибгарлик 72 фоизга, талончилик 47 фоизга, ўғрилик 46,5 фоизга камайишига эришилди.
Сўнгги вақтларда ўтказилаётган тезкор тадбирлар
Аввалроқ Фарғона вилоятида ИИВ ишчи гуруҳи томонидан “Тозалаш” комплекс тезкор-профилактик тадбирлари ўтказилаётгани ҳақида хабар берилганди. Жамоат тартибини сақлаш, ҳуқуқбузарликлар профилактикаси ҳамда йўл ҳаракати хавфсизлигини таъминлаш йўналишларида рейд тадбирлари ташкил этилиб, 8 нафар ов қуролини ҳужжатсиз ноқонуний сақлаб келаётган, 27 нафар жамоат жойида тиғли буюм олиб юрган шахсларга нисбатан жиноий ва маъмурий чоралар кўрилган.
ДХХ ҳамда ИИВ тузилмалари томонидан 27—31 январь кунлари мамлакат миқёсида “Антитеррор-тозалаш” кенг кўламли тадбирлари ўтказилганди. Криминоген вазиятни барқарорлаштириш ва унга салбий таъсир кўрсатувчи шахс ва жиноий гуруҳларни аниқлаш мақсадида жами 946 та махсус тадбирлар ўтказилиб, оғир ва ўта оғир жиноятлар содир этишга мойил 418 киши ушланганди.
ДХХ ҳамда ИИВ тузилмалари томонидан 2025 йилнинг 3—4 февраль кунлари мамлакат миқёсида “Қорадори” кенг кўламли тадбирларининг дастлабки босқичи олиб борилди. Унда 112 килодан ортиқ гиёҳвандлик воситалари мусодара қилинди.
Шунингдек, Ўзбекистон ДХХ ҳамда ИИВ тузилмалари томонидан жорий йилнинг 5—7 февраль кунлари мамлакат миқёсида “Орият” ва “Қорадори” кенг кўламли тадбирлари ўтказилганди.
Шу билан бирга, Фарғонада 2,5 гектар ерни 650 минг долларга сотмоқчи бўлган шахс ушланган эди.
Изоҳ (0)