Андижон вилоятида ўтказилган “Тозалаш“ комплекс тезкор-профилактик тадбирларида бир қатор жиноятларга чек қўйилди. Бу ҳақда ИИВ матбуот хизмати хабар берди.
Вилоят ҳудудида олиб борилган тадбирлар доирасида 106 та жиноий, 596 та маъмурий, жами 702 та ҳолат аниқланди. 117 нафар шахс жиноий жавобгарликка тортилган бўлса, 633 нафар шахсга нисбатан маъмурий чоралар кўрилди. 39 та жиноят фош этилиб, 30 нафар қидирувдаги шахслар ушланди. 1123 нафар шахс расмий огоҳлантирилди.
Қўлга олинган жиноий гуруҳлар ва шахслардан 4,5 кг гиёҳвандлик воситалари, 1452 дона кучли таъсир қилувчи дори воситалари, 24 та ноқонуний қурол, 478 та тиғли буюмлар олиниб, ашёвий далил сифатида расмийлаштирилди.
Ўтказилган тезкор тадбирларда 2006 ва 2002 йилда туғилган икки нафар шахс қўлга олинди. Улар ўзаро тил бириктириб, 1988 йилда туғилган аёлнинг шахсга доир маълумотларини ижтимоий тармоқларда тарқатиш билан қўрқитиб, 5 минг доллар талаб қилган. Ушбу пуллардан 2,5 минг долларни олган вақтида ушланди.
Андижон шаҳрида ўтказилган тезкор тадбирда Хўжаобод туманида яшовчи шахс 2 гектар ер майдонини юқори лавозимда ишловчи танишлари орқали ҳужжатларини расмийлаштириб беришни айтиб, эвазига 300 минг доллар талаб қилган. У келишилган пуллардан 50 минг долларни олган вақтида ушланган.
Шунингдек, яна бир ҳолатда 1967 йилда Андижон шаҳрида туғилган шахс яшаш уйи ертўласида гиёҳвандлик ва кучли таъсир қилувчи дори воситалари борлиги аниқланди. 2 кг 37 грамм марихуана ва 86 дона кучли таъсир қилувчи дори воситаларини сотишни кўзлаб сақлаб келаётганлиги фош этилди.
Бундан ташқари, 2 нафар шахс 2024 йил август ойидан буён Андижон шаҳридаги хонадонида моддий манфаат эвазига 13 нафар вояга етмаган болаларга ноқонуний диний сабоқ бериб келаётгани аниқланди.
Шу билан бирга, Андижон туманда яшовчи 1988 йилда туғилган шахс 7 нафар фуқарога ноқонуний диний сабоқ бериб келгани фош этилди.
Ҳолатлар бўйича тегишли ҳужжатлар расмийлаштирилиб, суриштирувчи-тергов ҳаракатлари олиб борилмоқда.
Сўнгги вақтларда ўтказилаётган тезкор тадбирлар
Аввалроқ Фарғона вилоятида ИИВ ишчи гуруҳи томонидан “Тозалаш” комплекс тезкор-профилактик тадбирлари ўтказилаётгани ҳақида хабар берилганди. Жамоат тартибини сақлаш, ҳуқуқбузарликлар профилактикаси ҳамда йўл ҳаракати хавфсизлигини таъминлаш йўналишларида рейд тадбирлари ташкил этилиб, 8 нафар ов қуролини ҳужжатсиз ноқонуний сақлаб келаётган, 27 нафар жамоат жойида тиғли буюм олиб юрган шахсларга нисбатан жиноий ва маъмурий чоралар кўрилган.
ДХХ ҳамда ИИВ тузилмалари томонидан 27—31 январь кунлари мамлакат миқёсида “Антитеррор-тозалаш” кенг кўламли тадбирлари ўтказилганди. Криминоген вазиятни барқарорлаштириш ва унга салбий таъсир кўрсатувчи шахс ва жиноий гуруҳларни аниқлаш мақсадида жами 946 та махсус тадбирлар ўтказилиб, оғир ва ўта оғир жиноятлар содир этишга мойил 418 киши ушланганди.
ДХХ ҳамда ИИВ тузилмалари томонидан 2025 йилнинг 3—4 февраль кунлари мамлакат миқёсида “Қорадори” кенг кўламли тадбирларининг дастлабки босқичи олиб борилди. Унда 112 килодан ортиқ гиёҳвандлик воситалари мусодара қилинди.
Шунингдек, Ўзбекистон ДХХ ҳамда ИИВ тузилмалари томонидан жорий йилнинг 5—7 февраль кунлари мамлакат миқёсида “Орият” ва “Қорадори” кенг кўламли тадбирлари ўтказилганди.
Шу билан бирга, Фарғонада 2,5 гектар ерни 650 минг долларга сотмоқчи бўлган шахс ушланган эди.
Изоҳ (0)