“Ҳудудий электр тармоқлари” АЖ Жиззах филиали директори А.А. наркотик моддалар билан қўлга олинган. Бу ҳақда воқеадан хабардор “Дарё” манбаси хабар берди.
Маълум бўлишича, “Ҳудудий электр тармоқлари” АЖ Жиззах филиали ҳайдовчиси бошқарувидаги Matiz хизмат автомашинаси Ғаллаорол туманидан Сангзор ЙПХ масканида тўхтатилиб, текширилганда автомобилда йўловчи сифатида кетаётган, ушбу ташкилотнинг автотранспорт ва механизмлар хизмати бошлиғи Ж.Ў.нинг ёнидан гиёҳванд модда топилган.
Суриштирувлар давомида ушбу модда “Ҳудудий электр тармоқлари” АЖ Жиззах филиали директори А.А. учун олиб кетилаётгани аниқланган.
Тадбир давомида корхона раҳбари ва бошқа иштирокчилар ашёвий далиллар билан қўлга олинган.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)