Ўзбекистонга Тожикистон ва Қирғизистондан контрабанда йўли билан олиб келинган 48 килодан ортиқ наркотик моддалар мусодара қилинди.
Давлат хавфсизлик хизматининг Сурхондарё вилояти бўйича бошқармаси ва вилоят ички ишлар бошқармаси ходимлари ҳамкорлигида ўтказилган тезкор тадбирда Денов туманида истиқомат қилувчи, муқаддам гиёҳвандлик воситалари савдоси билан боғлиқ жинояти учун судланган 1984 йилда туғилган шахс Тожикистондан айланма йўллар орқали наркотик моддаларни олиб келиб, сотиш билан шуғулланаётган ҳолати аниқланиб, унинг яшаш хонадони кўздан кечирилган.
Натижада хонадон ертўласидан 576 грамм героин, 2 килограмм 447 грамм опий ва 1 килограмм 913 грамм гашиш моддалари процессуал тартибда расмийлаштириб олинган.
Шунингдек, унинг муқаддам гиёҳвандлик воситалари савдоси билан боғлиқ жинояти учун судланган, 1956 йилда туғилган отасидан 9 килограмм 62 грамм гашиш моддаси ҳамда келиб чиқиши ноаниқ бўлган 137 460 доллар ва 569 миллион 832 минг сўм олинган.
Бундан ташқари, тезкор тадбир давом эттирилиб, унинг муқаддам гиёҳвандлик воситалари савдоси билан боғлиқ жинояти учун судланган, 1980 йилда туғилган акаси ва Узун туманида истиқомат қилувчи, 1987 йилда туғилган жиноий шериги ҳам қўлга олиниб, жиноий шеригининг уйидан ҳам келиб чиқиши ноаниқ бўлган 159 400 доллар олинган.
ДХХ Чегара қўшинлари ва Наманган вилояти бўйича бошқармаси ҳамкорлигида Янгиқўрғон туманида ўтказилган тезкор тадбирда Янгиқўрғон—Наманган йўналишида ҳаракатланаётган автобус тўхтатилиб, кўздан кечирилганда йўловчи сифатида кетаётган, мазкур туманда яшовчи 1999 ва 2002 йилларда туғилган икки нафар фуқаро сумкаларида жами 19 килограмм 915 грамм гашиш моддаси борлиги аниқланиб, тегишли тартибда расмийлаштириб олинган.
Терговга қадар текширув давомида, улар гиёҳвандлик воситасини келгусида сотиш мақсадида Қирғизистондан контрабанда йўли билан олиб келгани аниқланган.
Андижон вилоятида кузатилган ҳолатда эса Марҳамат туманида яшовчи, 1996 йилда туғилган, муқаддам судланган шахс ўзбек-қирғиз давлат чегарасининг мазкур туман ҳудудидан ўтувчи қисмига келиб, аввалроқ Қирғизистон фуқароси томонидан контрабанда йўли билан ўтказиб берилган 4 килограмм 931 грамм опий ва 9 килограмм 949 грамм гашиш моддаларини олиб, қайтаётган вақтида Чегара қўшинлари ҳарбий хизматчилари томонидан ушланган.
Ҳозирда мазкур шахсларга нисбатан Жиноят кодексининг 246 (контрабанда) ва 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) билан жиноят ишлари қўзғатилиб, тергов ҳаракатлари олиб борилмоқда.
Февраль ойи бошларида Сурхондарёда 13,5 тонна супурги орасига гиёҳванд воситасини яшириб олиб киришга уриниш фош этилганди. Дастлабки ҳисоб-китобларга кўра, мазкур гиёҳвандлик воситасининг қора бозорлардаги нархи тахминан 16,5 миллион доллардан ошади. Ҳозирда ҳолат юзасидан терговга қадар текширув ҳаракатлари давом эттирилмоқда.
Ўзбекистонда тўхатиб қолинган йирик миқдордаги гиёҳвандлик воситалари
1992−1994 йилларда қўмитанинг Сурхондарё вилояти бошқармаси томонидан қарийб 15,5 тоннадан ортиқ гиёҳвандлик воситалари тўхтатиб қолинган. 1992 йил 8-октябрда майиз ортилган контейнер ичида 13 тоннадан ортиқ гашиш яширилгани аниқланган. Ушбу гиёҳвандлик воситаларининг қора бозордаги нархи ўша вақтларда 1,3 миллиард долларни ташкил қилган.
1993 йил 16 февралида эса ёнғоқ ортилган 2 та темирйўл контейнерда 1167 килограмм гашиш яширилгани фош қилинган. Шу йили Сурхондарёда авторефрижераторнинг том қисмига яширилган 1,2 тонна героиннинг олиб ўтилишининг олди олинган.
Ўзбекистонда сўнгги беш йилда наркологик ҳисобга олинган 14 ёшдан 30 ёшгача бўлган гиёҳвандлик воситалари истеъмолчилари 60 фоизга кўпайган.
Изоҳ (0)