Андижон вилоятида “Тозалаш“ комплекс тезкор-профилактик тадбирлари ўтказилди. Бу ҳақда ИИВ матбуот хизмати хабар берди.
Тадбирлар давомида қарийб 11 йил аввал босқинчилик жиноятини содир этган шахсларнинг жиноий қилмиши фош этилди. Шаҳрихон тумани, “Байроқ” туманида яшовчи фуқаронинг хонадонига 2014 йил 21 май тунида икки нафар ниқобли шахс пичоқ ва ов қуроли билан кириб, хонадон эгаси ва унинг оиласига ҳужум қилган.
Номаълум шахслар пул талаб қилган. Уй эгаларига кимгадир бу ҳақда мурожаат қилган тақдирда ўлдириб кетиш билан таҳдид қилган. Уй эгасининг телефонини синдириб, номаълум томонга яширинган.
Ушбу жиноятни 1990 ва 1993 йилда туғилган икки нафар шахс содир этгани аниқланиб, улардан бири қўлга олинди. Унинг жиноий шеригига нисбатан эса қидирув олиб борилмоқда.
Жиноятни содир этишда фойдаланилган ов милтиғи олиниб, ашёвий далил сифатида расмийлаштирилди.
Шунингдек, Хўжаобод туманида 1984 йилда туғилган шахс бошқарувидаги Lacetti автомашинаси тўхтатиб текширилди. Унда жами 2 кг гашиш гиёҳвандлик воситаси борлиги аниқланди.
Бундан ташқари, яна бир ҳолатда ноқонуний майнинг фермасини ташкил этган шахс аниқланди. Унинг хонадонидаги майнинг қурилмалар ва совитиш омбори туман электр тармоқлари корхонаси билан шартнома тузмасдан, ноқонуний равишда тармоққа уланиб фаолият юритиб келган.
Бунинг оқибатида 1,2 млрд сўмлик зарар етказилган.
Сўнгги вақтларда ўтказилаётган тезкор тадбирлар
Аввалроқ Фарғона вилоятида ИИВ ишчи гуруҳи томонидан “Тозалаш” комплекс тезкор-профилактик тадбирлари ўтказилаётгани ҳақида хабар берилганди. Жамоат тартибини сақлаш, ҳуқуқбузарликлар профилактикаси ҳамда йўл ҳаракати хавфсизлигини таъминлаш йўналишларида рейд тадбирлари ташкил этилиб, 8 нафар ов қуролини ҳужжатсиз ноқонуний сақлаб келаётган, 27 нафар жамоат жойида тиғли буюм олиб юрган шахсларга нисбатан жиноий ва маъмурий чоралар кўрилган.
ДХХ ҳамда ИИВ тузилмалари томонидан 27—31 январь кунлари мамлакат миқёсида “Антитеррор-тозалаш” кенг кўламли тадбирлари ўтказилганди. Криминоген вазиятни барқарорлаштириш ва унга салбий таъсир кўрсатувчи шахс ва жиноий гуруҳларни аниқлаш мақсадида жами 946 та махсус тадбирлар ўтказилиб, оғир ва ўта оғир жиноятлар содир этишга мойил 418 киши ушланганди.
ДХХ ҳамда ИИВ тузилмалари томонидан 2025 йилнинг 3—4 февраль кунлари мамлакат миқёсида “Қорадори” кенг кўламли тадбирларининг дастлабки босқичи олиб борилди. Унда 112 килодан ортиқ гиёҳвандлик воситалари мусодара қилинди.
Шунингдек, Ўзбекистон ДХХ ҳамда ИИВ тузилмалари томонидан жорий йилнинг 5—7 февраль кунлари мамлакат миқёсида “Орият” ва “Қорадори” кенг кўламли тадбирлари ўтказилганди.
Шу билан бирга, Фарғонада 2,5 гектар ерни 650 минг долларга сотмоқчи бўлган шахс ушланган эди.
Изоҳ (0)