Хонанда Шаҳриёр наркотик модда билан қўлга олингани рад этилди

ИИВ ахборот хизмати раҳбари Шоҳрух Ғиёсов хонанда Шаҳриёр наркотик модда билан қўлга олингани ҳақидаги хабарларни рад этди.

Тошкент шаҳар ИИББ ЙҲХБ “Шарқ” ЙПХ масканида фуқаронинг ёнидан гиёҳвандлик моддаси топилгани ҳақида хабар берганди. 25 февраль куни ЙПХ ходимлари томонидан Onix русумли транспорт воситаси тўхтатилиб ҳайдовчи билан суҳбат жараёнида автомашинада йўловчи сифатида келаётган шахс ўзининг ҳаракатлари билан ходимларда шубҳа уйғотган.

Холислар иштирокида ушбу шахс текширилганда кийимлари орасига яшириб олган гиёҳвандлик моддаси аниқланган ва тегишли тартибда Бектемир тумани ИИО ФМБга олиб бориб топширилган.

“Бу хабарни айрим оммавий ахборот воситалари гумонланувчи шахс айнан хонанда Шаҳриёр эканини ёзиб тарқатишмоқда. Ушбу ахборот ҳақиқатдан йироқлигини маълум қиламиз”, дейди Шоҳрух Ғиёсов.

ИИВ ахборот хизмати раҳбари бу каби хабар тарқатиш айбсизлик презумпсияси талабларини, шунингдек, шахсга доир маълумотлар тўғрисидаги қонуннинг 14-моддаси ҳамда Оммавий ахборот воситалари тўғрисидаги қонуннинг 6-моддасини қўпол равишда бузиш ҳисобланишини билдириб, ОАВ ва жамоатчиликни суриштирув ва терговга оид ахборотни тарқатишларида қонунчилик талабларига қатъий риоя қилишга чақирди.