Ўзбекистон БМТ Хавфсизлик кенгашининг 2035—2036 йилларда доимий бўлмаган аъзолигига ўз номзодини илгари сурди, деб хабар бермоқда “Дунё” ахборот агентлиги.
Келтирилишича, Ўзбекистоннинг БМТдаги доимий вакили, элчи Улуғбек Лапасов Хитой раислигида БМТ Хавфсизлик кенгашининг кўп томонлама ва глобал бошқарув институтларини ислоҳ қилиш масалаларига бағишланган йиғилишида маъруза билан иштирок этди.
Унда Ўзбекистоннинг БМТ билан ўзаро ҳамкорликнинг энг устувор масалалари бўйича расмий позицияси халқаро ҳамжамиятга етказилди. Ўзбекистоннинг кўп қиррали, глобал бошқарувни мустаҳкамлаш ва такомиллаштириш тарафдори экани таъкидланди. Шунингдек, минтақавий ҳамкорлик муҳимлиги ва Афғонистонни иқтисодий тиклашдан манфаатдор экани қайд этилди.
Мамлакат трансмиллий таҳдидларга, жумладан, гиёҳвандлик моддаларнинг ноқонуний айланиши, терроризм ва уюшган жиноятчиликка қарши курашда БМТ билан ҳамкорликни янада кенгайтиришга тайёрлиги тасдиқланди.
Иштирокчиларга иқтисодий барқарорликни таъминлаш, камбағалликни қисқартириш ва ёшлар имкониятларини кенгайтиришга қаратилган “Ўзбекистон-2030” стратегиясининг мазмун-моҳияти ва аҳамияти хусусида сўзлаб берилди. Ўзбекистонда 2025 йил – “Атроф-муҳитни муҳофаза қилиш ва ”яшил иқтисодиёт“ йили”, деб эълон қилингани қайд этилди.
Қайд этилишича, Орол фожиаси оқибатларини юмшатиш мақсадида ўрмонлар барпо этиш, сувни тежаш, қайта тикланадиган энергия манбаларидан фойдаланиш борасида кенг кўламли ишлар амалга оширилаётгани маълум қилинди. Шунингдек, Оролбўйида барқарор ривожланишни халқаро қўллаб-қувватлашни кенгайтириш зарурлиги таъкидланди.
Аъзо давлатлар 2025 йил июнь ойида Самарқанд шаҳрида бўлиб ўтадиган БМТнинг “Беш йил – 2030 йилгача: Барқарор келажак учун давлат хизматларини кўрсатишни жадаллаштириш” мавзусидаги давлат хизматлари форумига таклиф қилинди.
Ўзбекистоннинг глобал тинчлик ва хавфсизликни таъминлаш тарафдори эканлигига урғу берилди. Шу нуқтайи назардан, мамлакат БМТ Хавфсизлик кенгашининг 2035—2036 йиллар учун доимий бўлмаган аъзолигига ўз номзодини илгари сургани маълум қилинди.
Маълумот учун, БМТ Хавфсизлик кенгаши — дунёнинг энг муҳим органларидан бири бўлиб, у глобал тинчлик ва хавфсизликни таъминлашда, шунингдек, фавқулодда ҳолатларда қарорлар қабул қилишда марказий рол ўйнайди.
Изоҳ (0)