Тошкент шаҳрининг Яккасарой туманида тезкор тадбир ўтказилди, деб хабар берди пойтахт ИИББ матбуот хизмати.
Тезкор тадбирда Иван исмли шахс қўлга олинди. Унинг хонадони холислар билан кўздан кечирилганда катта миқдордаги гиёҳвандлик воситаларини сақлаб келаётганлиги аниқланди.
Гумонланувчи мазкур гиёҳвандлик воситаларини интернет орқали олиб, граммларга ажратиб, яшириш йўли билан тарқатиб келган.
Олинган гиёҳвандлик воситалари 8 кг 303 грамм бўлиб, баҳоси 4 млрд 317 млн сўмни ташкил этади.
Ҳолат юзасидан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилди.
Ушбу шахсга нисбатан қамоққа олиш тарзидаги эҳтиёт чораси қўлланилган.
Мазкур моддага кўра суд ҳукми билан 20 йилгача озодликдан маҳрум қилиш жазоси назарда тутилган.
Гиёҳванд моддалар савдоси
2024 йилнинг март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)