Давлат хавфсизлик хизматининг ИИВ ва Божхона қўмитаси ходимлари билан ҳамкорлигида ўтказган тезкор тадбирда қарийб 100 килограмм гиёҳвандлик воситалари олиб қўйилди.
ДХХнинг Сурхондарё вилояти бўйича бошқармаси ходимлари томонидан ички ишлар органлари билан ҳамкорликда ўтказилган тезкор тадбирда Сариосиё туманида яшовчи, 1977 йилда туғилган, муқаддам судланган шахс тожикистонлик наркокурерлар томонидан Узун тумани ҳудудидаги хуфия жойга қолдириб кетилган 82 килограмм 478 грамм опий моддасини олиб, маҳаллий фермер хўжаликларидан бирининг нотурар биносига яшириб қўймоқчи бўлган вақтида ушланди.
Аниқланишича, у 2 минг доллар хизмат ҳақи эвазига, тожикистонлик наркосавдогарнинг кўрсатмасига асосан ушбу гиёҳвандлик воситасини келгусида белгиланган жойга етказиб бериши керак бўлган.
ДХХ ва ИИВ ходимлари ҳамкорлигида Наманган вилоятининг Косонсой туманида ўтказилган тезкор тадбирда, 2001 йилда туғилган шахс синтетик гиёҳвандлик воситаларини “закладка” тарзида жойлаштираётган вақтида қўлга олинган.
Шунингдек, у ўз қайнанасининг яшаш хонадонида нарколаборатория ташкил қилгани аниқланиб, тинтув-тергов ҳаракатлари давомида ушбу манзилдан 9 килограмм 450 грамм “Мефедрон” синтетик гиёҳвандлик воситаси ашёвий далил сифатида олинган.
Бундан ташқари, мазкур фуқаро томонидан мижозларга сотиш мақсадида хуфия жойларга қолдирилган жами 595 грамм “Мефедрон” моддаси ҳам тегишли тартибда расмийлаштириб олинган.
Бошқа ҳолатда эса Россиядан халқаро почта жўнатмалари орқали бошқа товар номи остида пластик идишда юборилган 7 килограмм 313 грамм синтетик каннабиноид аналоги бўлган “5-Флуро-ADB” гиёҳванд моддасини қабул қилиб олганларида Тошкент шаҳрида вақтинча яшовчи, 2001 ва 2002 йилларда Қашқадарё вилоятида туғилган икки нафар шахс ДХХ ва Божхона қўмитаси ходимлари томонидан қўлга олинган.
Аниқланишича, улар WhatsApp орқали танишган номаълум профил эгаси топшириғига кўра, 500 доллар эвазига ушбу ажал оғусини Тошкент шаҳридан Самарқанд вилоятига етказиб бериши керак бўлган. Шундан сўнг, тезкор тадбир давом эттирилиб, мазкур наркотик моддани Самарқанд вилоятида қабул қилиб олган вақтларида Паст Дарғом туманида яшовчи, 2001 ва 2002 йилларда туғилган икки нафар фуқаро ҳам ушланган.
Улардан бирининг Самарқанд шаҳридаги хонадони кўздан кечирилганда синтетик гиёҳвандлик воситаларини тайёрлаш учун мўлжалланган яширин лаборатория ташкил қилингани маълум бўлди.
Ҳозирда барча ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, қамоқ эҳтиёт чораси қўлланди. Тергов ҳаракатлари олиб борилмоқда.
25 февраль куни Ўзбекистонга Тожикистон ва Қирғизистондан контрабанда йўли билан олиб келинган 48 килодан ортиқ наркотик моддалар мусодара қилинганди. Хусусан, Сурхондарёда наркотик моддалар савдоси билан шуғулланган ота ва унинг икки ўғли қўлга тушган.
Изоҳ (0)