Беш йил ичида мамлакатда наркотик моддаларни ноқонуний сотишга доир жиноятлар сони икки бараварга кўпайди. Бу ҳақда Олий суд эълон қилган ҳисоботда ёзилган.
2024 йилда Жиноят кодексининг 270, 271, 273-276-моддаларига дахлдор жиноятлар содир этганликда айбланиб, 8 373 киши судланган. Мазкур моддалар асосида судлов гиёҳвандлик билан боғлиқ жиноят содир этганликни англатади.
Таҳлилларга қараганда, 2020 йилда ушбу турдаги жиноятга қўл урганлар 3 941 нафар, 2021 йилда 4 182 нафар, 2022 йилда 5 825 нафар бўлган. 2023 йилда бундай қилмишни содир этганлар сони янада ошиб, 6 204 нафарга етган. Ўтган йили эса бундай жиноят кўчасига кирганлар 2169 нафарга ёки 35 фоизга кўпайган.
Ҳудудлар кесимида гиёҳвандлик билан боғлиқ жиноятларнинг энг кўп улуши Тошкент шаҳрида қайд этиб келинмоқда. Жумладан, пойтахтда 2022 йилда 1218 шахс, 2023 йилда 1309 шахс, 2024 йилда 1999 шахс мазкур жиноятни содир этган. Шу билан бирга, ўтган йили Фарғона (1410 нафар) ва Тошкент (1219 нафар) вилоятларида ушбу турдаги қонунга хилоф ҳаракатга қўл урганлар сони нисбатан кўп бўлган.
Умуман олганда, ўтган йил давомида наркотик моддалар муомаласи билан боғлиқ жиноятлар улуши бошқа жиноятларга қараганда кўпроқ ўсган. Ундан кейинги ўринни ўғирлик содир этганлар эгаллаган. Бундай жиноят содир этганлар сони 2023 йилда 7 319 нафар бўлса, 2024 йилда 8 321 нафарни ташкил этган.
Ҳисоботга кўра, 2024 йили Ўзбекистондаги судларда 61 481 та жиноий иш кўриб чиқилди, охирги беш йилликдаги энг кўп — 77 995 киши судланди. Улар содир этган жиноятларнинг ижтимоий хавфлилик даражаси турлича. Масалан, қарийб 22 951 киши (29 фоиз) оғир, 4 144 киши (5 фоиз) ўта оғир жиноят содир этган.
Аввалроқ Ўзбекистоннинг қайси ҳудудида энг кўп жиноят содир этилаётгани очиқланганди.
Изоҳ (0)