Америкалик ўсмир бола юрак-қон томир тизимидаги касалликларни бир неча сонияда аниқлайдиган, сунъий интеллект асосида ишловчи махсус иловани яратди. Бу ҳақда Oddity Central нашри хабар берди.
Даллас шаҳрида яшовчи Сиддхартх Нандяла исмли бола томонидан ишлаб чиқилган ушбу инновацион илова юрак фаолиятига оид носозликларни етти сония ичида аниқлай олади. Манбаларга кўра, дастур ҳозирга қадар АҚШда 15 мингдан ортиқ, Ҳиндистонда эса 700 га яқин беморда синовдан ўтган бўлиб, 96 фоиз аниқлик билан ташхис қўйган.
Сиддхартх сунъий интеллект соҳасида Oracle ва ARM каби йирик компаниялар томонидан сертификатланган энг ёш мутахассис сифатида эътироф этилган. Унинг ишлаб чиққан технологияси Ҳиндистоннинг Гунтур шаҳридаги давлат касалхонасида синовдан ўтказилиб, юқори самарадорлик кўрсатган.
Ҳайдаробод шаҳрида бўлиб ўтган Сунъий интеллект бўйича глобал саммитда ёш ихтирочи Circadian AI дастурини айнан тиббий хизматлардан чекланган ҳудудлардаги инсонларга тезкор ёрдам кўрсатиш учун ишлаб чиққанини алоҳида таъкидлади.
Ҳиндистоннинг Андҳра Прадеш штати бош вазири Сиддхартх билан учрашувда унинг салоҳиятини юқори баҳолаб, кейинги лойиҳаларини қўллаб-қувватлашини билдирган. Ёш бўлишига қарамасдан, Сиддхартх ўрта мактабни аллақачон тамомлаб, ҳозирда Даллас университетида компьютер фанлари йўналишида таҳсил олмоқда.
Изоҳ (0)