Соч ва тирноқларни тезроқ ўстириш ҳамда мустаҳкамлаш учун ейиш керак: биотинга бой 8 маҳсулот

Биотин соч ва тирноқларнинг соғломлиги учун зарур модда сифатида танилган, шунинг учун у кўпинча гўзаллик учун мўлжалланган қўшимчалар таркибига киритилади. Ҳақиқатан ҳам, бу витамин кератиннинг ишлаб чиқарилишида иштирок этади, бу эса соч ва тирноқларнинг асосий таркибий қисмидир. Бироқ у бизга фақат шу мақсадда керак эмас.

Биотин, шунингдек, коэнзим (ферментларнинг ўз функцияларини бажариши учун зарур бўлган бирикма) сифатида ишлайди ва организмда овқатни энергияга айлантиришда ёрдам беради. Бундан ташқари, витамин асаб тизими учун ҳам муҳимдир: у кайфиятни тартибга солувчи ва асаб импулсларини узатувчи дофамин, серотонин ва бошқа нейротрансмиттерлар синтезида иштирок этади.

Оддий қилиб айтганда, биотин нафақат гўзал бўлиш учун, балки соғлиқ учун ҳам зарурдир. Шунингдек, биотин сувда эрийдиган витамин, яъни организм уни сақламайди. Бундан ташқари, танамиз биотинни ўзи ишлаб чиқара олмайди — биз уни фақат овқатдан олишимиз мумкин.

Кунда 30 микрограмм биотинга эга бўлиш учун нима ейиш керак? Диетологлар томонидан тузилган энг яхши 8 та маҳсулот рўйхатига қаранг:

Лосось: Агар сизга лососни кўпроқ истеъмол қилиш учун сабаб керак бўлса, марҳамат: бу балиқ биотиннинг ажойиб манбайи ҳисобланади. Бундан ташқари, унда мия ва юрак соғлиғини қўллаб-қувватлайдиган омега-3 ёғ кислоталари, шунингдек, иммунитетни мустаҳкамловчи ва тўқималар соғлиғини яхшилайдиган кўп миқдорда оқсил, рух ва селен мавжуд.

Тухум: Тухум сариғи узоқ вақт давомида “ёмон” холестерин манбайи деб ҳисобланган. Бироқ сўнгги пайтларда диетологларниг фикри ўзгарган. Бир дона тухум сариғида 10 микрограмм биотин, шунингдек, мия соғлиғини қўллаб-қувватлайдиган холин ва иммунитет ҳамда суяклар учун муҳим бўлган D витамини мавжуд. Тухум оқи эса юқори сифатли оқсил бўлиб, у мушакларни тиклаш ва ўсиш учун зарурдир.

Писта: Агар сиз вегетариан бўлсангиз, кунгабоқар уруғларидан биотин олишингиз мумкин. Бу энг яхши вариантлардан биридир — унда нафақат чорак стаканда 2,6 микрограмм биотин, балки асаб ва юрак-қон томир тизимлари учун муҳим бўлган фойдали ёғлар ва магний ҳам бор. Бундан ташқари, уларда кўп миқдорда оқсил ва толалар мавжуд — улар секин ҳазм бўлади ва организмнинг қондаги шакарга бўлган реакциясини юмшатади.

Сардина: Бир қути сардинада тахминан 5 микрограмм биотин мавжуд. Бундан ташқари, улар омега-3 ёғ кислоталари билан бой, улар яллиғланишга қарши таъсирга эга эканлиги маълум ва юрак, мия соғлиғини қўллаб-қувватлайди. Бундан ташқари, сардиналар бутунлигича, суяклари билан консервалангани сабабли у кальций ва коллагенга бой.

Мол жигари: Мол жигари биотиннинг энг яхши манбаларидан биридир: 100 граммида 200 микрограмм биотин мавжуд, бу кунлик норма миқдоридан деярли етти баравар кўп. Бундан ташқари, бу маҳсулот темирга бой, у бутун организмга кислород ташишга ва энергия ишлаб чиқаришни қўллаб-қувватлашга ёрдам беради.

Бодом: Энди таъми ажойиб бодомни ҳар куни истеъмол қилиш учун яна бир сабаб бор. Чорак стакан бодомда тахминан 1,5 микрограмм биотин мавжуд. У шунингдек, юрак ва асаб тизими соғлиғи учун зарур бўлган фойдали ёғлар, E витамини ва магнийнинг ажойиб манбайи ҳисобланади.

Шампинён: Биотинга бой яна бир ўсимлик маҳсулоти Шампинёндир. 100 грамм қўзиқоринда тахминан 16 микрограмм — кунлик норманинг ярми мавжуд. Шунингдек, уларда соғлом метаболизм ва иммунитет тизимини қўллаб-қувватловчи B гуруҳидаги бошқа витаминлар ва антиоксидантлар мавжуд.

Ширин картошка

Ёрқин тўқ сариқ рангга эга ширин картошка оддий картошкадан анча фойдали. У 100 граммлик бир порция да 2 микрограмм биотинни ўз ичига олади ва бета-каротин — А витаминига ҳам бой, бу тери ва кўз соғлиғи учун фойдалидир. Бундан ташқари, ширин картошка ичак метаболизмини яхшилайдиган кўп миқдордаги толаларни ўз ичига олади.