Ушбу ичимлик эрталаб ёки кун давомида ҳолсизлик кузатилганда энергия бахш этади ҳамда юрак хасталиклари ва қандли диабет хавфини камайтиради. Бироқ кўпчилик қаҳванинг жигар саломатлигини яхшилаши мумкинлиги ҳақида билмайди.
Қайд этиш лозимки, қаҳва бўйича қуйидаги тадқиқот унинг айнан қора тури ҳақидадир. Фойдали қаҳвага ҳеч қандай сут, қаймоқ, шакар ва бошқа қўшимчалар қўшилмайди. Албатта, бу билан қаҳванинг бошқа турларидан воз кечиш шарт эмас, аммо қаҳванинг тури унинг самарадорлигига тўғридан тўғри таъсир қилишини унутмаслик керак.
Қаҳванинг жигар ферментларига таъсири
Жигар шикастланганда, қонга кўп миқдорда аспартат аминотрансфераза (АСТ) ва аланин аминотрансфераза (АЛT) ферментлари киради. Агар уларнинг қондаги даражаси паст бўлса, демак, жигар шикастланмаган саналади. Шунингдек, бундай ферментлар токсинларни парчалаш, сафро ишлаб чиқариш жараёнида иштирок этади ва инфекцияларга қарши курашда ёрдам беради.
Тадқиқотларга кўра, кундалик қаҳва истеъмоли АЛT ва АСТ ферментлари даражасини камайтиради. Ушбу назария қаҳва таркибида жигар циррозидан ҳимоя қилувчи таркибий қисм бор, деган фаразни тасдиқлайди.
Жигар фибрози
Жигар фибрози — бу жигар тўқималарининг шикастланиши натижасида соғлом ҳужайраларнинг бириктирувчи тўқима (чандиқ) билан алмашиши жараёни. Бундай ҳолда, жигарда бириктирувчи тўқима ўса бошлайди, яъни орган ўзидаги яраларни ёпиш учун қўшимча ҳужайраларни “ўстиришга” ҳаракат қилади. Бу ҳолат жигар фаолиятининг ёмонлашишига олиб келиши мумкин ва агар даволанмаса, цирроз ҳамда жигар етишмовчилигига сабаб бўлиши мумкин. Бу алкоголизм, семизлик, гепатит B ёки C билан оғриган беморларда жуда кенг тарқалган ташхисдир.
Албатта, бундай касалликка чалинган беморларни даволашга қаҳва ёрдам бермайди, аммо айнан қаҳва (ва ўсимлик чойи)ни тез-тез истеъмол қилиш жигар тўқималарининг зичлигини пасайтиради. Яъни жигар фиброзининг ривожланиши секинроқ кечади.
Цирроз
Бундан ташқари, сўнгги тадқиқотларга кўра, қаҳва алкоголь туфайли ҳосил бўлган жигар циррози хавфини камайтиришга ёрдам беради.
Жигар саратони
Қаҳва жигар саратони хавфини ҳам камайтириши мумкин. Бу ерда калит сўз — “мумкин”. Тадқиқот муаллифларининг айтишича, ҳозирча хулоса чиқаришга ҳали эрта ва тасдиқловчи далилларни тўплаш ва ушбу назарияни тўлиқ ўрганиш учун яна бир неча йил керак бўлади.
Изоҳ (0)