Хитойнинг Poseidon компанияси экстремал шароитларда ишлай оладиган ва жабрланганларга автоматик тарзда тиббий ёрдам кўрсата оладиган дунёдаги биринчи қутқарув роботини ишлаб чиқди. У махсус оёқлар, ғилдираклар ёки занжирли (гусеница) ҳаракатланиш тизими билан жиҳозланган бўлиб, улар орқали зинапоя, қиялик ва нотекис юзалар каби қийин тўсиқларни енгиб ўтишга қодир.
Қурилма ҳаракатланиш чекланган жойларда ҳам осонгина манёвр қилади ва турли тўсиқлардан моҳирлик билан четлаб ўтади. Шунингдек, тез ёрдам роботи -20 дан +55 °C гача бўлган ҳароратларда ҳам ишлай олади.
Қурилманинг асосий хусусияти портатив биринчи ёрдам тизими бўлиб, у қуйидагиларни ўз ичига олади:
- инсоннинг ҳаётий белгиларини мониторинг қилиш тизими;
- сунъий нафас бериш аппарати;
- инфузион терапия модули;
- V-ултратовуш текширув тизими;
- юрак ритмини тиклаш учун дефибриллятор;
- юрак-ўпка реанимацияси;
- кислород етказиб бериш тизими.
Бундай мураккаб ва энг керакли функцияларга эга робот фавқулодда вазиятларда шошилинч ҳолатларда тез тиббий ёрдам кўрсатиш имкониятини беради.
Ишлаб чиқувчиларнинг сўзларига кўра, робот қуйидаги соҳаларда катта талабга эга бўлади:
- табиий офатлар пайтидаги қутқарув операцияларида;
- ҳарбий шароитларда (жанг майдонидан ярадорларни олиб чиқишда);
- мураккаб саноат ва шаҳар аварияларида;
- шифохонагача бўлган масофада ва шифохона ичидаги тиббий ёрдамда.
Мутахассисларнинг фикрича, ушбу янги технология тез тиббий ёрдам соҳасида “моддий шаклга эга сунъий интеллект” вазифасини бажаради. Анъанавий қутқарув усуллари вақт ва кўплаб мутахассисларни талаб қилса, бу робот мустақил равишда тез ва аниқ ҳаракат қила олади.
Poseidon корпорацияси вакиллари бу лойиҳа Хитойнинг фавқулодда тиббий ёрдам кўрсатиш салоҳиятини сезиларли даражада ошириб, уни янада самарали ва технологик жиҳатдан илғор қилиши мумкинлигини таъкидлади.
Изоҳ (0)