Аввалроқ Ўзбекистонда Leapmotor енгил автомобилларини сертификатлаш вақтинча тўхтатилгани ҳақида хабар берилганди. Техник жиҳатдан тартибга солиш соҳасида назорат инспекцияси матбуот хизмати ушбу ҳолат юзасидан изоҳ берди.
Маълум қилинишича, яқинда лабораторияда Хитойнинг Leapmotor компаниясига тегишли C16 русумли автомобиль синовдан ўтказилди. Натижалар шуни кўрсатдики, ушбу автомобиль халқаро стандартларга, хусусан, Бирлашган Миллатлар Ташкилоти томонидан белгиланган хавфсизлик талабларига жавоб бермайди (белгиланган меъёрдан 16 баравар кўп).
“Ўзбекистон илмий-синов ва сифат назорати маркази” ДМнинг синов лабораторияси томонидан 2025 йил 10 март куни СБ-0309-388/25-сонли синов баённомасига асосан УзТР.237-016:2017 стандарти, илова № 3, п.44 бўйича “Устуворлик ва ташқи электромагнит нурланишга бардошлилик (кенг полосали электромагнит шовқинлар)” талабларига номувофиқлик ҳолати аниқланган.
Электромагнит мослашувчанлик – электрон қурилмалар ва тизимлар ўртасида электромагнит майдонлар таъсирини минималлаштириш учун ўтказиладиган муҳим синовдир. Бундай синовлар транспорт воситалари учун ҳам зарур, чунки электромагнит майдонларнинг автомобиль электрон тизимларига таъсири хавфсизликка жиддий таъсир қилиши мумкин.
Бундан ташқари, электромагнит нурланишнинг инсон саломатлигига таъсири ҳам муҳим масала ҳисобланади. Тадқиқотларга кўра, юқори даражадаги электромагнит майдонлар организмга салбий таъсир кўрсатиши, жумладан, асаб тизими, юрак-қон томир тизими ва ҳатто саратон касалликлари хавфини ошириши мумкин.
“Шу сабабли автомобиль танлашда халқаро талаб ва стандартларга жавоб берадиган маҳсулотларни афзал кўришни ҳамда автомобиль танлашда хавфсизлик меъёрларига риоя қилган ҳолда расмий дилерларга мурожаат қилишингизни сўраймиз”, дейилади хабарда.
Автомобиль бозори қандай ҳолатда?
Ноябрь ойида 2024 йилнинг III чорагида Ўзбекистон автомобиль бозорида фаоллик даражаси ошган бўлса-да, 2023 йилги даражада эмаслиги ҳақида хабар берилганди. Хусусан, июль сентябрь ойларида давлат рўйхатидан ўтказилган автомобиллар сони 352,8 мингтани ташкил қилиб, II-чоракдагига нисбатан 76,8 мингтага (27,8 фоизга) кўпайди. Бироқ, бу кўрсаткич 2023 йилнинг мос давридагига нисбатан 19,9 фоиз кам.
Декабрь ойи аввалида Lacetti, Nexia, Spark каби оммабоп автомобиллар нархлари пасайгани ҳақида хабар берилган.
Ўзбекистонда 2024 йил октябрида автомобиль бозорида сотувлар яна пасайгани айтилган эди. Октябрь ойида автотранспорт воситаларининг савдоси 102,3 минг донани ташкил этди, бу ўтган ойга нисбатан 7 фоизга кам. Йиллик кўрсаткичда эса пасайиш — 44 фоиздан кўпроқ.
Изоҳ (0)