Ҳозирда машҳур корейс актёрларини бутун дунё танийди. Бироқ ҳақиқий юлдузлар ўйнаганига қарамай, катта шуҳрат қозонмаган қизиқарли дорамалар ҳам анчагина.
“Самога йўл” (2021)
Бева қолган Хан Жон У ва унинг Аспергер синдромига чалинган ўғли Ги Ру “Самога йўл” номли марҳумларнинг уйларини тозалаш бўйича оилавий бизнесга эга. Улар доимо мижозлар хотирасига ҳурмат билан ёндашиб, энг муҳим буюмларни уларнинг қариндошларига топширадилар. Тўсатдан Жон У юрак етишмовчилигидан вафот этади ва Ги Рунинг вақтинчалик васийси бўлиб отасининг укаси — яқинда қамоқдан чиққан Чо Сан Гу тайинланади. У жанг санъати устаси, энди акасининг васиятига кўра, у Ги Ру билан бирга яшаши ва ишлаши керак.
“Тила тилагингни” (2022)
Юн Кёре шафқатсизликка тўла ҳаётдан чарчаган ёлғиз инсон. Бир куни у бедаво хасталар даволанувчи шифохонага жамоат ишлари учун боради. У ерда ўлим тўшагидаги беморларнинг сўнгги истакларини бажо келтирувчи гуруҳ раҳбари Кан Те Шик ва беморларига қўлидан келганча ёрдам беришга ҳаракат қилаётган ғайратли ва меҳрибон ҳамшира Со Ён Жу билан танишади. Бу учрашув Юн Кёренинг ҳаётида бурилиш нуқтаси бўлади.
“Шоумен” (2016)
Шин Сок Ҳо мусиқа гуруҳини машҳур қилишга эришган менежер. У янада кўпроқ нарсага интилади, шу сабабли ўз мусиқий студиясини очишни режалаштиради, аммо унинг ҳаракатлари муваффақиятсизликка учрайди. Саноатга қайтиш мақсадида у ота-онасининг фожиали ҳалок бўлишидан сўнг қўшиқчи бўлиш орзусидан воз кечган Ҳа Нил билан танишади. Ҳа Нилнинг синглиси Гё Рин Сок Ҳога ишонмайди ва акасини ҳимоя қилиш учун ўқишдан академик таътил олиб, унинг менежерига айланади. Улар биргаликда муваффақиятга эришиш йўлида машаққатли меҳнат ва кўплаб қийинчиликларни енгишлари керак бўлади.
“Казино” (2022)
Ча Му Сик казино бошқарарди, бироқ Миллий солиқ хизматининг таъқиблари туфайли Филиппинга қочишга мажбур бўлади. У тўлақонли казино бизнесини йўлга қўйиш учун Филиппиндаги сиёсий ҳамда ишбилармон доираларни ўз таъсирига олиш стратегиясини ишлаб чиқади. Аммо кутилмаганда уни тузоққа туширадилар ва изидан корейс детективи О Сун Ҳун тушади.
“Ўлим мадҳияси” (2018)
Ким У Жин исмли истеъдодли театр сценарий ёзувчисининг ажойиб иши ва севимли оиласи бор. Эркак авваллари турмуш ўртоғига хиёнат қилишни ҳатто хаёлига ҳам келтирмаган бўлса-да, қўшиқчи Юн Шим Докка ошиқ бўлиб қолади. Уларнинг ўзаро муҳаббати иккаласи учун ҳам ҳақиқий фожиага айланади, лекин шу билан бирга “Ўлим мадҳияси” деб номланган машҳур корейс қўшиқларидан бирининг яратилишига сабаб бўлади.
“Оқ Рождество” (2011)
Хусусий мактабнинг саккиз ўқувчиси ўлимни башорат қилувчи аноним хат олгандан сўнг қишки таътилда қолишга мажбур бўлади. Ўқитувчилардан бири ҳам улар билан қолишга қарор қилади. Биринчи кечада қор бўрони туфайли йўлда қолиб кетган психолог Ким Ё Хан уларга қўшилади. Рождество арафасида ўқувчилар хатлар ҳазил эмаслигини, аксинча қотил ҳақиқатан ҳам яқин атрофда эканлигини англаб етишади.
Изоҳ (0)