6 апрель куни Мадридда ўтказилган ярим марафонда қатнашган икки эркак юрак муаммолари сабабли вафот этди. Бу ҳақда Eldiario.es хабар бермоқда.
Марҳумлардан бири 35 ёшда эди. Маълум қилинишича, у маррага 500 метр қолганда юрак хуружига учраган. Эркак шифохонага етказилган бўлса-да, шифокорлар унинг ҳаётини сақлаб қололмаган.
Иккинчи марҳум 20 ёшда бўлиб, у ҳам тезлик билан шифохонага олиб келинган, аммо ўша ерда жон берган.
Таъкидланишича, ярим марафонда жами 27 минг киши иштирок этган, 50 нафар спортчига тиббий ёрдам кўрсатилишига тўғри келди.
Мадрид ярим марафони 24 йилдан буён ўтказиб келинади. 35 ёшли эркакнинг вафоти Мадрид ярим марафони тарихида қайд этилган биринчи ҳодиса эмас. 2010 йилда 31 ёшли спортчи ўша пайтда Эл-Ретиро боғида жойлашган пойга маррасини кесиб ўтгач, ҳушидан кетиб вафот этган.
Ушбу воқеадан сўнг, югурувчилар маррага осонроқ етиб боришлари ва 20 километрдан ортиқ масофага югуришдан кейин юқори шиддатли якуний босқичдан қочиш учун марра чизиғи текисроқ жойга кўчирилган. Бу йил марра чизиғи Пасео де Реcолетосда, Испания Миллий кутубхонаси олдида, ҳеч қандай жиддий баландликларсиз жойлаштирилган.
Бундан ташқари, 2005 йилда Мадридлик яна бир 24 ёшли йигит пойгада иштирок этаётганда тўсатдан вафот этган. Югурувчи мусобақа пайтида ҳушини йўқотган ва юраги тўхтаб қолган. Юрак хуружи кутилмаганда содир бўлгани сабабли, уни даволаган тиббиёт ходимлари унинг ҳаётини сақлаб қолиш учун ҳеч нарса қила олмадилар.
Изоҳ (0)