Бевақт сўнган юлдузлар: ҳаётдан эрта кўз юмган Болливуд актрисалари

Болливуд — порлоқ юлдузлар, ҳаяжонли фильмлар ва ажойиб ижролар дунёси. Аммо айрим истеъдодли актрисалар шон-шуҳрат чўққисига чиққан пайтида ҳаётдан кўз юмган, баъзилари эса тақдирнинг оғир зарбаларига дош беролмай орамизни тарк этган. Уларнинг қисқа умр йўли, унутилмас роллари ва сирли вафоти ҳанузгача кўпчиликни ҳайратга солиб келади. Ушбу мақолада Болливуд кино саноатининг энг ёрқин, аммо бевақт ҳаётдан кўз юмган актрисалари ҳақида ҳикоя қиламиз.

Дивя Бҳарати — 19 ёш

1993 йил 5 апрелда Болливуд ўзининг энг истиқболли актрисаларидан бирини — 19 ёшли Дивя Бҳаратини йўқотди. У кино саноатининг навбатдаги суперюлдузи сифатида эътироф этилган бўлиб, жуда қисқа фаолияти давомида бир қатор муваффақиятли фильмларда рол ўйнашга улгурган эди. Унинг энг машҳур фильмлари орасида “Роса ва олов”, “Телба севги”, “Уч ғазабга тўлган эркак 2” каби картиналар бор эди.

Атиги 18 ёшида Дивя таниқли продюсер Сажид Надиадвалага турмушга чиқди. Аммо бу бахт узоққа чўзилмади: актриса ўз квартирасининг деразасидан номаълум сабабларга кўра қулаб тушди ва вафот этди. Унинг вафотидан кейин кўплаб миш-мишлар пайдо бўлди: айримлар буни тасодифий бахтсиз ҳодиса деса, бошқалар буни жиноят ёки ҳатто ўз жонига қасд қилиш эҳтимоли билан боғлайди. Лекин ҳалигача бу сир очилмаган ва актрисанинг ўлими Ҳиндистон киносининг энг жумбоқли фожиаларидан бири бўлиб қолмоқда.

Бугунги кунда ҳам Дивя Bharatининг номи Болливуд тарихида унутилмас номлардан бири сифатида тилга олинади. У яратган образлар, ижро этган роллари ва ёрқин қиёфаси ҳанузгача мухлислар ёдидан ўчмаган.

Смита Патил — 31 ёш

Смита Патил Болливуднинг энг севимли актрисаларидан бири эди. У ўзининг истеъдоди ва санъатга бўлган чексиз муҳаббати билан танилган бўлиб, миллий мукофот совриндори, томошабинлар ва танқидчиларнинг ардоғидаги актриса сифатида эътироф этилган. Бироқ унинг шахсий ҳаёти доимо баҳс-мунозараларга сабаб бўлган.

Смита турмуш ўртоғи бўлган актёр Раж Баббар билан учрашгач, уларнинг муносабатлари жамоатчилик эътиборини тортди. Раж Баббар аллақачон турмуш қурган бўлса-да, Смита унга иккинчи рафиқа бўлиб турмушга чиқди ва бу қарор жамиятда катта шов-шувга сабаб бўлди, сўнг жуфтлик фарзандли бўлишди. Оилада Пратик Баббар туғилди. Аммо бундай бахт узоққа чўзилмади: Смита Патил фарзанди дунёга келганидан атиги икки ҳафта ўтиб, туғруқдан кейинги асоратлар сабаб вафот этди. Ўшанда актриса атиги 31 ёш эди.

Смита Патил Болливуднинг тижорий фильмларидан кўра чуқур мазмунли ва ижтимоий мавзуларга асосланган фильмларида кўпроқ рол ўйнаган. У ҳинд жамиятидаги аёллар мавқеини юксалтириш, уларнинг ҳуқуқлари ва муаммоларини ёритишга ҳаракат қилган. Шунингдек, Смита Патил фақатгина актриса эмас, балки фаол аёл ҳуқуқлари ҳимоячиси ҳам бўлган. У интервьюларида кўп маротаба Ҳиндистон аёлларининг ҳаёти, гендер тенглиги ва ижтимоий адолатсизлик мавзуларида ўз фикрларини билдиришдан тортинмаган.

Гита Бали — 35 ёш

Гита Бали ҳам Ҳиндистоннинг ёрқин кино юлдузларидан бири бўлиб, ҳаётдан жуда эрта кўз юмган. У нафақат муваффақиятли актриса, балки садоқатли рафиқа ва меҳрибон она сифатида ҳам танилган. Унинг турмуш ўртоғи машҳур актёр Шамми Капур эди.

Актрисанинг ҳаёти кутилмаганда 1965 йилда чечак касаллиги сабабли якун топди. Атиги 35 ёшида оламдан ўтган Гита Бали Болливуд саҳнасида ёрқин из қолдириб, ўзининг истеъдоди ва гўзаллиги билан мухлислар қалбидан чуқур жой олган эди.

Гита Бали ўзининг шўхлиги, табиий жозибаси ва актёрлик маҳорати билан томошабинларни ром этган актриса эди. 1950 йилларда у Ҳиндистон киносида ўз ўрнига эга бўлиб, ўша даврнинг етакчи актрисаларидан бири сифатида ном қозонган.

Мадҳубала — 36 ёш

Мадҳубала 1933 йил 14 февралда дунёга келган. Туғилган пайтидаёқ шифокорлар унинг юрак туғма нуқсони борлигини ва узоқ яшай олмаслигини айтишган. Бироқ у тақдир синовларига қарамай, ўсиб улғайди ва Ҳиндистон кино тарихидаги энг гўзал ҳамда иқтидорли актрисалардан бирига айланди. Мадҳубала 1969 йил 23 февралда, бор-йўғи 36 ёшида ҳаётдан кўз юмди. У қисқа умрида ўзидан буюк мерос қолдирди, айниқса, “Буюк Мўғул” фильмидаги Анаркали роли унинг номини абадий машҳур қилди.

Актрисанинг шахсий ҳаёти ҳам кўпчиликнинг эътиборида бўлган. Мадҳубала ва Дилип Кумар ўртасидаги севги ҳикояси Болливуд тарихидаги энг машҳур муҳаббат қиссаларидан бири ҳисобланади. Аммо тақдир уларни бирлаштирмади ва Мадҳубала кейинчалик Кишор Кумар билан турмуш қурди. Бироқ соғлиғидаги муаммолар туфайли охирги йилларини тўшакка михланиб ўтказди. Юрак хасталиги сабаб у кинодан узоқлашишга мажбур бўлди. 1969 йилда, 36 ёшида, Ҳиндистон киносининг Мона Лизаси деб номланган бу гўзал актриса оламдан ўтди.