Ёш қизга уйлангани сабаб оиласи билан жанжаллашиб, юрак хуружини бошдан кечирган машҳур турк актёри — Ўзжан Денизнинг серқирра ҳаёти

Ўзжан Дениз — истеъдодли турк актёр, қўшиқчи, режиссёр ва мусиқачи. У ўз касбининг ҳақиқий устаси. Кўп йиллар олдин актёр ота-онасининг маслаҳатига қулоқ солганида, дунё унинг истеъдодидан бебаҳра қолиши мумкин эди.

Ўзжан Дениз 1972 йил 19 майда Анқарада туғилган. Узоқ вақт давомида мухлислари актёрнинг оиласи кино олами ёки шоу-бизнесга ҳеч қандай алоқаси йўқ деб ўйлашган, аслида эса у машҳур қўшиқчи Шакиронинг жияни бўлган. Ўзжан 6 ёшидаёқ вокал қобилиятларини намоён эта бошлаган ва ота-онаси уни мусиқа мактабига беришга қарор қилган. 13 ёшида Дениз театрга қизиқиб қолган. У мустақил равишда песалар ёзиб, театр спектаклларини саҳналаштирган ва дарсдан ташқари тадбирларда катта иштиёқ билан қатнашган.

Турк сериаллари юлдузи 16 ёшида ота-онасига ўқишни ташлаб, бутун ҳаётини мусиқа ва саҳнага бағишлашини айтган. Оиласининг қаршилигига қарамай, Ўзжан Истанбулга кўчиб ўтади ва мусиқий фаолиятини бошлайди, бу унга катта даромад келтиради. Кейинчалик у Германияга кўчиб, бир неча йил давомида овози ва имижи устида ишлайди.

Ижодий фаолияти

Ўзжан Дениз кинематографиядаги илк қадамини 1994 йилда Мемдуҳ Ун режиссёрлигидаги “Севишимни унга айт” фильми билан бошлаган. Бироқ унинг дастлабки шуҳрати Нургул Ешилчай билан бирга рол ижро этган “Хонадон” сериали орқали келди. Актёрнинг кейинги фаолияти муваффақиятли ривожланди. 2004 йилда у “Июнь кечаси” кўп қисмли фильмида, кейинчалик “Қаердасан Фируза?”, “Тақдир”, “Севги тафти”, “Келўғлон Қарапренсга қарши” ва бошқа фильмларда суратга тушди.

“Қора гул” ва “Севги тақдирга қарши” каби сериаллар Ўзжанга жаҳон миқёсидаги шуҳрат келтирди. 2017 йилда у Туркияда машҳур ёзувчи ва руҳшунос Гулсерен Будайжиоғлунинг романи асосида суратга олинган “Истанбуллик келин” сериалида бош ролни ижро этди.

Турк актёри “Сени узоқ кутдим”, “Синхрон”,“Қизил ғунчалар”, “Иккинчи имконият”, “Ҳаммаси севги туфайли”, “Нариги томон”,“Сув ва олов”, “Сен менинг уйимсан” каби кўплаб сериал ва фильмларда рол ижро этган.

Ўзжан Дениз нафақат истеъдодли ва серқирра актёр, балки моҳир режиссёр ва сценарий муаллифи ҳамдир. Кинематографиядаги муваффақиятли фаолиятига қарамай, у мусиқани ҳам ҳеч қачон эътибордан четда қолдирмайди. Турдизи юлдузи мунтазам равишда янги қўшиқлар яратиб, ўзининг яккахон концертларини бериб келмоқда.

Шахсий ҳаёти

1991 йилда турк актёри ҳамкасби Хандан Дениз билан оила қуради. Тўққиз йиллик никоҳдан сўнг эр-хотин ажрашади, афсуски фарзандлари йўқ эди. “Июнь кечаси” сериалининг суратга олиш жараёнларида Ўзжан Наз Элмас билан учраша бошлайди, у билан ажрашганидан бир неча ой ўтгач эса, Фаҳрие Эвжен билан муносабатга киришади. Жуфтликнинг мухлислари улар албатта никоҳ қуришига ишонган, аммо бундай бўлмайди.

2011 йилдаёқ Дениз янги севгилиси — 18 ёшли актриса Бусе Наржини жамоатчиликка таништиради. У билан ажрашгандан сўнг, актёр бир муддат шахсий ҳаётини ошкор қилмай қўяди.

2018 йил март ойида у Фейза Актан билан иккинчи бор никоҳдан ўтади ва бир неча ҳафтадан сўнг, Фейза Кузей исмли ўғлини дунёга келтиради. Афсуски, бу никоҳ ҳам узоққа чўзилмайди. Фарзанди туғилгандан кейин, эр-хотин жанжаллари туфайли оммавий ахборот воситаларида тез-тез тилга олина бошлайди. Фейза эрини зўравонликда ва ичкиликбозликда айблайди ҳамда суддан фарзандига ягона васийлик ҳуқуқини беришни талаб қилади, аммо Ўзжан бунга қатъиян қарши чиқади. Улар расман 2019 йилнинг ёзида ажрашади, бироқ узоқ вақт давомида ўзаро муросага кела олмайди.

2023 йил январь ойида Ўзжан Дениз эронлик моделер Самар Дадгарга уйланади. Ёш аёл эрининг ўғли билан тез тил топишиб, тез-тез бирга вақт ўтказадиган бўлишади. Айтганча, Самар билан муносабатлар бошланганидан сўнг, Ўзжан Кузейнинг онаси билан ҳам дўстона алоқалар ўрнатади.

Туркиялик актёр суҳбатларида учинчи рафиқаси унга тақдир инъоми эканини бир неча бор таъкидлаган. Бироқ айнан шу никоҳ Ўзжан ва унинг қариндошлари ўртасидаги можароларга асосий сабаб бўлди.

Самар Дадгар билан муносабатлар бошланиши биланоқ, Ўзжан севгилисини онаси билан таништиради. Бироқ Кадрие Дениз ўғлининг танловини маъқулламайди. Актёр ва дизайнернинг тўйидан сўнг, турдизи юлдузи кўп йиллар давомида менежери бўлиб келган акасини ишдан бўшатгани маълум бўлади.

Шундан кейин, турк оммавий ахборот воситаларида Ўзжаннинг онаси, синглиси ва акаси билан зиддиятлари ҳақидаги хабарлар тез-тез пайдо бўла бошлади. Аввалига актёрнинг синглиси унинг хотинини очкўзликда айблади, кейин эса Кадрие айнан Самар туфайли у оиласи билан алоқани узганини айтди. Аммо кейинчалик уларнинг жанжали янада кучайди. Актёр онаси берган интервьюни кўриб, суратга олиш майдончасида аҳволи ёмонлашди. У юрак хуружи билан касалхонага ётқизилди, аммо шифокорларнинг саъй-ҳаракатлари туфайли соғайиб кетди.

Бир неча кундан сўнг маълум бўлдики, Ўзжаннинг акаси уни солиқ идорасига чақиб, актёрнинг гўёки даромадининг катта қисмини яшираётганини хабар қилган. Ангиография муолажасидан кейин, Дениз ижтимоий тармоқларда акасига очиқчасига мурожаат қилиб, уни ақлдан озганликда ва тақиқланган моддаларни суиистеъмол қилишда айблади.

Самар Дадгар эрининг оиласи билан муносабатлари ҳақида ҳеч қандай фикр билдирмаяпти. Ўзжан Денизнинг ўзи ҳам бу можаронинг асл моҳиятини очишга шошилмаяпти, фақат бир марта доимо хотинининг томонида туришини айтган холос. Кадрие Дениз, шунингдек, унинг катта ўғли ва қизи можаронинг сабаби айнан Ўзжаннинг учинчи хотини эканлигига ишонишади. Уларнинг фикрича, бу аёл актёрни ўз манфаатлари йўлида ишлатиб, алдов йўли билан уни яқин ва қадрдон инсонларига қарши қайраб қўйган эмиш.

Ўзжан Дениз ҳозирда

Ҳозирда турк актёр “Қизил ғунчалар” лойиҳасидаги суратга тушишда давом эттирмоқда. Бўш вақтини эса янги альбом ёзишга ва учинчи рафиқаси билан дам олишга сарфлайди. Ўзжан шовқин-суронли шаҳарлардан узоқда сайр қилишни ёқтиради, яхтада сайр қилишни севади ва уй таомларини афзал кўради. Дениз ўғли Кузейни ҳам ёнига олиб, болада мусиқага ва умуман санъатга муҳаббат уйғотишга интилади.