Американинг Air Products and Chemicals Inc компанияси Ўзбекистонда бир қанча лойиҳаларни амалга оширмоқчи. Бу ҳақда Инвестициялар, саноат ва савдо вазирлиги хабар берди.
Келтирилишича, 2 апрель куни “Марказий Осиё – Европа Иттифоқи” саммити арафасида инвестициялар, саноат ва савдо вазири Лазиз Кудратов Air Products and Chemicals Inc компанияси бош ижрочи директори Эдуардо Менезес билан учрашди.
Томонларнинг диққат марказида фойдаланишга топширилган лойиҳаларнинг самарадорлиги, амалга оширилаётган ва янги истиқболли ва ўзаро манфаатли ташаббусларни ҳаётга татбиқ қилиш масалалари бўлди.
Лазиз Кудратов компаниянинг Ўзбекистондаги муваффақиятли тажрибасини таъкидлади. 2019 йилдан буён компания мамлакат ҳудудларида умумий қиймати 1,15 миллиард доллар бўлган учта йирик инвестиция лойиҳасини амалга оширди. Улар орасида Фарғона нефтни қайта ишлаш заводида водород ишлаб чиқариш ва “Навоийазот” АЖда суюқ карбонат ангидрид газини ишлаб чиқариш.
Бугунги кунда компания Бухородаги MTO мажмуасида кислород ва азот ишлаб чиқариш бўйича лойиҳаларни амалга оширмоқда ва 200 миллион доллардан ортиқ сармоя киритган. Мажмуа пластмасса, автомобилсозлик ва қурилиш каби соҳаларни метанол ва олефин билан таъминлашга мўлжалланган.
Углеродни ушлаш ва сақлаш, авиация ёқилғиси ишлаб чиқариш ва кўмирни газлаштириш бўйича янги лойиҳалар ҳам кўриб чиқилмоқда.
Учрашув якунлари бўйича томонлар ҳамкорликни янада чуқурлаштиришга ўзаро тайёр эканликларини тасдиқлади ва жорий лойиҳаларни муваффақиятли якунлаш ҳамда янги лойиҳаларни амалга ошириш доирасида самарали ҳамкорлик қилиш механизмларини ишлаб чиқди.
Кейинги йилларда АҚШ билан товар айирбошлаш ва инвестициялар ҳажми бир неча баробар ортди, бизнес кооперацияси кучаймоқда.
Тошкент шаҳрида Вебстер университети ва Америка технология университети фаолият кўрсатмоқда.
Бундан ташқари, транспорт, божхона, миграция, маданият ва бошқа устувор йўналишларда ўзаро манфаатли ҳамкорлик амалга оширилмоқда.
Изоҳ (0)