Тарихда илк бор олтин нархи бир унсия учун 3200 доллардан ошди. Чикаго товар биржасидаги (CME) савдоларда нарх 1,77 фоизга кўтарилиб, энг юқори чўққисида 321,6 долларга етди. Бу ҳақда Bloomberg хабар берди.
2 апрелдаги савдо якунларига кўра, олтин нархи 3166,2 долларни ташкил этди. Бу бир кун олдинги даражадан 0,64 фоизга юқори. Олтин бозоридаги кескин ўсиш АҚШ президенти Дональд Трамп янги импорт божларини эълон қилганидан кейин кузатилди. Ўзбекистон товарларига ҳам 10 фоизлик бож солинмоқда. Баъзи мамлакатларга нисбатан божлар миқдори эса 50 фоизга етган.
Бу АҚШнинг ҳаракатлари жаҳон иқтисодиёти секинлашишига сабаб бўлиши мумкинлиги ҳақидаги хавотирларни келтириб чиқарди. Натижада, инвесторлар хавфсиз ҳисобланган активларга, жумладан, олтинга йўналишди, бу эса қимматбаҳо металл нархининг кўтарилишига туртки бўлди.
Олтин нархи бўйича прогнозлар
Қимматбаҳо металл қиймати 2025 йил аллақачон 21 фоиздан кўпроққа ошди. Ўтган йили олтин қиймати бир қатор омиллар, жумладан, қулай пул-кредит сиёсати ва марказий банкларнинг фаол харидлари, инвесторларнинг хавфсиз активларига бўлган талаби туфайли 27 фоиздан ошганди.
Goldman Sachs каби бир нечта йирик банклар олтиннинг мақсадли нархларини юқорига кўтарди. Goldman Sachs таҳлилчилари йил охирига келиб олтин нархи бир унсия учун 3300 долларга етишини прогноз қилмоқда. Мутахассислар марказий банклар томонидан олтинга бўлган талаб илгари прогноз қилинганидан юқори бўлишини кутмоқда.
Morgan Stanley таҳлилчилари ҳам олтин бозоридаги ўсиш ҳали тугамаганини ва 2025 йилда олтин нархи бир унсия учун 3400 долларга етиши мумкинлигини айтган.
Изоҳ (0)