Disney мультфильмларида асосий қаҳрамонларнинг ота-онасиз ёки ҳеч бўлмаганда онасиз тасвирланиши кўп йиллардан буён кузатиладиган ҳолат. Томошабинлар буни тасодиф деб ўйлаши мумкин, аммо аслида бу муҳим драматургия воситаларидан биридир.

Disney мультфильмларидаги етим қолган қаҳрамонлар рўйхати анча узун, масалан, “Музюрак”даги Анна ва Элза, “Бемби”даги кийик Бемби, “Оловуддин”даги Оловуддин ва Жасмин, “Сув париси”даги малика Ариэль, “Золушка”даги Золушка, “Оппоғой ва етти гном”даги Оппоғой, “Соҳибжамол ва Махлуқ” даги Белл ҳамда “Лило ва Стич”даги Лило ва бошқа кўплаб қаҳрамонларнинг ё онаси, ёки ота-онаси йўқ ҳолатда тасвирланади.
Драматик сюжет ва қаҳрамонларнинг ўсиши
Дисней фильмларида ота-онанинг йўқлиги қаҳрамонларнинг вояга етиш жараёнини тезлаштиради ва уларнинг кучли характерга эга бўлишига туртки беради.

“Малефисента” фильмининг бош продюсери Дон Хан бу борада қуйидагича фикр билдиради:
Қаҳрамонлар ота-онасиз қолганида анча тез улғаяди. Масалан, Бембининг онаси ўлдирилади ва у тезроқ вояга етишга мажбур бўлади. Беллнинг эса фақат отаси бўлади, лекин у ҳам йўқолиб қолади, шунинг учун қиз унинг ўрнини эгаллашга мажбур бўлади.
Дисней студияси ўз фильмларида ёш қаҳрамонларни синовларга дучор қилган ҳолда уларнинг ўсишини кўрсатишни мақсад қилади. Ота-оналарининг йўқлиги қаҳрамонларни мустақил қарор қабул қилишга ва ҳаётнинг қийинчиликларига бардош беришга мажбур қилади.
Дисней асосчиси Уолт Диснейнинг психологик ҳолати

Машҳур мультфильмлар бундай сюжетга эга бўлишининг яна бир эҳтимолий сабаби Уолт Диснейнинг шахсий ҳаётига бориб тақалади. У 1940 йилларда онасидан айрилган. Унинг волидаси Уолт сотиб олган уйдаги бахтсиз ҳодиса сабабли вафот этган. Бу фожиа Дисней ҳаётида чуқур из қолдириб, унинг ижодига таъсир қилган бўлиши мумкин.
Дон Ҳаннинг Glamour журналига берган интервьюсига кўра, Дисней ушбу бахтсиз ҳодисага билвосита сабабчи эканини ўйлаб, ўзини доим айбдор ҳис қилган. Бу эса унинг фильмларида ота-онасиз қолган қаҳрамонларни яратишига илҳом берган бўлиши мумкин.
Мифология ва эртаклар анъанаси
Disney фильмларининг аксарияти халқ эртакларига асосланган бўлиб, уларнинг кўпчилигида қаҳрамонлар ота-онасиз тасвирланади. Бундай мотивлар анъанавий эртакларда ҳам учрайди, чунки улар қаҳрамоннинг ички ўсишини ҳамда келажакда эгаллаган марра ва ютуқларини ёрқинроқ акс эттиришига замин яратади.
Изоҳ (0)