Кўплаб томошабинлар, айниқса, ёши катталар машҳур “Қизалоқ ва маймоқ” мультфильмидаги бир хусусиятга аҳамият берган бўлса керак: вақт ўтишига қарамай, Маша ўзгармайди. Мультфильмда эса фасллар ўтаверади, ўнлаб янги эпизодлар чиқади, аммо бош қаҳрамон ҳали ҳамон шаддод ва самимий қизалоқ бўлиб қолаверади. Савол туғилади, нега Маша улғаймайди?
Бунинг сабаби анимацион сериал жанри ва форматининг ўзига хос хусусиятларидадир: мультфильм 2-6 ёшдаги болалар учун мўлжалланган бўлиб, уларнинг қизиқиши доимий қолиши ҳамда аудитория хотирасида яхши сақланиши учун бош қаҳрамон ўзгармаслиги керак. Агар Маша улғайса, у болаларга энди унчалик яқин ва қизиқарли бўлмаслиги мумкин, чунки улар Машани айнан шу ҳолича яхши кўриб қолган.
Бунда бренд барқарорлиги ҳам катта аҳамиятга эга. Мультфильм бренди остидаги маҳсулотлар (ўйинчоқлар, китоблар, кийим-кечаклар) айнан кичик Маша образи билан боғлиқ.
Шунингдек, “Қизалоқ ва маймоқ” сериалининг ҳар бир қисми деярли алоҳида ҳикоя сифатида ишланган, унда вақтнинг ўтиши сезилмайди. Шу сабабли қаҳрамонлар ўзгармайди. Бошқа шу каби машҳур мультфильмларда ҳам персонажлар улғаймайди, масалан, “Том ва Жерри”, “Симпсонлар” ва “Губка Боб” каби мультфильмлар ҳам шу тамойилга асосланган.
Қолаверса, эртаклар дунёсида буларнинг бари табиий ҳол ҳисобланади.
Изоҳ (0)