“Ошин”нинг Ўзбекистондаги намойишига 25 йил тўлди: сериал бош қаҳрамонини гавдалантирган актрисанинг тақдири қандай кечди?

Ўзбек аёлларига жуда яқин тимсол “Ошин”, жуда кучли ва ҳеч қачон таслим бўлмайдиган, юзида табассум билан доимо яхши ҳаётга интилган, аммо камтар ва садоқатли образ сифатида 2000 йилдан буён ўзбек киноихлосмандларининг қалбидан жой олиб келмоқда. Ошиннинг ўрта ёшлардаги даврини ижрони этган Юко Танака шахсий ҳаётида бефарзанд бўлишига қарамай, сериалда фарзанди учун ҳамма нарсага тайёр она ролини жуда ишонарли ва моҳирона ижро этган.

Кинодаги илк қадамлар

Юко Танака 1955 йилда Япониянинг Осака шаҳрида дунёга келган. У Мейдзи университетини тамомлаган кўп қиррали актриса.

1979 йилда, Танака фаолиятининг бошланишида NHK телевидениесининг “Опа Ма” драма сериалида, 1981 йилда “Эйдзанаика” тарихий драмасида бош ролларни ижро этган. Танака ушбу икки фильмдаги роллари учун бир қатор мукофотларга эга бўлган, жумладан, Япония Кино академиясининг “Иккинчи даражали энг яхши актрисаси” мукофоти ва “Йилнинг энг яхши янги ижодкори” мукофотларига лойиқ деб топилган.

“Ошин” ролидаги муваффақиятлари

1983 йилда Япониянинг NHK телеканали ўзининг 30 йиллигини нишонлаш арафасида “Ошин” номли янги сериални намойиш этди. Бу мамлакат тарихидаги энг кўп томоша қилинган сериаллардан бири бўлган ва у 68 та бошқа давлатда инглиз тилидан араб тилигача бўлган субтитрлар билан намойиш этилган.

Ўша пайтларда Японияда сериалнинг ўртача йиллик томошабинлари сони 52,6 фоизни ташкил этган бўлса, “Ошин”нинг биргина қисмининг энг юқори рейтинги 62,9 фоизга етган. Ошин қатъият рамзи бўлиб, ҳатто энг қийин пайтларда инсон ҳеч қачон таслим бўлмаслиги кераклигини кўрсатган тарбиявий аҳамиятга эга фильмдир. Уни нафақат японлар, балки бутун дунё халқлари яхши кўрган.

Сериал 1900 йилда туғилган, камбағаллик ва ёмон муносабатларга дуч келган, лекин кейинги ҳаётида муваффақият ва бахтга эришган деҳқон қизи Ошиннинг ҳаётини ҳикоя қилади. Болаликдаги Ошин ролини Аяко Кобаяши ўйнаган, лекин Танака катта Ошин ролини ўз зиммасига олган. Сериал 1983 йилнинг апрелидан 1984 йилнинг мартигача деярли 300 та 15 дақиқалик қисмларда намойиш этилган ва унинг энг юқори рейтинги (62,9 фоиз) уни “япон телевидениеси тарихидаги энг машҳур драма”га айлантирган.

“Ошин”дан кейин Танака бадиий фильмларга қайтди ва 1985 йилнинг февралида Шочику томонидан суратга олинган “Капоне кўп йиғлайди” комедиясида, 1985 йилнинг августида Кен Такакурага қарши “Демон” драмасида бош ролларни ўйнади. Танака ушбу икки фильм учун Япония Кино академиясининг “Энг яхши иккинчи даражали аёл роли” номинациясига эга бўлган.

Кейинги ўн йил давомида Танака асосан телевидениеда ишлади ва ўнлаб телевизион фильмларда ва Мейдзи тикланиш даври ҳақидаги NHK’нинг ҳашаматли тарихий сериали “Гўёки учгандек”да иштирок этди. Ушбу сериал 1990 йилнинг январидан декабригача 48 та қисмда намойиш этилган.

1988 йилнинг майида Танака Эмили Бронтенинг классик романи асосида режиссёр Ёсишиге Ёсида томонидан суратга олинган “Момақалдироқли довон” фильмида Кино (романда Кетрин) ролини ўйнади. Фильмнинг воқеалари ўрта асрлар Япониясида содир бўлади.

Шахсий ҳаёт

Танака 1982 йилги “Тора-сан, мутахассис” фильмида биргаликда суратга тушган қўшиқчи ва актёр Кензи Савада билан танишган, шунингдек, улар 1985 йилда “Капоне кўп йиғлайди” фильмида биргаликда рол ўйнашган.

Ўша пайтда Савада қўшиқчи Эми Итога уйланган эди, лекин улар 1987 йилда ажрашишган. Сўнг Танака ва Савада 1989 йилнинг ноябрида турмуш қуришган ва ҳозирга қадар биргаликда бахтли турмуш кечиришмоқда.

Ижодий танаффусдан сўнг

Танака 2001 йилда Ясуо Фуруҳата томонидан суратга олинган Иккинчи жаҳон урушидан кейинги япон оилалари ҳақидаги “Чироқ” драмасида Кен Такакура билан биргаликда бош ролни ўйнаган. Фильм Япония Кино академияси мукофотининг 13 та номинациясига, жумладан, Танака “Энг яхши аёл роли” номинациясига сазовор бўлган.

Актрисанинг кейинги кинодаги роли 2005 йилнинг июлида чиққан “Сутчи” романтик драмасида сут етказиб берувчи бўлиб, ўзининг собиқ севгилисини учратган эллик ёшли ёлғиз аёл ролини ўйнади. Ушбу фильмдаги роли учун у 2006 йилда Япония Профессионал кино мукофотлари маросимида “Энг яхши аёл роли” мукофотига сазовор бўлган.

Шундан сўнг Танака телевидениега қайтиб, NHK’нинг “Плеядлар” тарихий драмасида бева қолган император хоним Ци ролини ўйнади. Хитой-Япония ҳамкорлигида ишлаб чиқарилган ушбу фильм 2010 йилнинг январидан июлига қадар Японияда 28 қисмда ва 2010 йилнинг мартида Хитойда намойиш этилган, иккала версия ҳам юқори рейтингларга эга бўлган.

“Ошин” Ўзбекистонда намойиш этилганига 25 йил тўлди

“Ошин” Ўзбекистондаги биринчи япон телевизион дубляж ишларидан саналади. Унга қадар Япония сериалларидан бирортаси ўзбекчага дубляж қилинмаган. “Ошин” телевидениеда намойиш қилингач, илк қисмлариданоқ рейтинги анча юқорилаган. Томошабинларнинг деярли барчасига манзур келган ва Ўзбекистоннинг турли ҳудудларидан миннатдорлик мактублари келарди. Сериал 2020 йилда, карантин пайтида қайта намойиш этилди. 

Сериалнинг дубляж режиссёри Шамсиддин Ҳисомиддинов уни овозлаштириш жараёнлари ҳақида “Дарё”га берган интервьюсида сўзлаб берганди. 

Юртимиз мустақилликка эришган илк йилларда Япония ва Ўзбекистон ўртасидаги кўплаб соҳаларни мустаҳкамлашга катта аҳамият қаратилган. Маданий алоқаларнинг амалдаги намунаси сифатида Япония ҳукумати “Ўзбекистон” телеканалига “Ошин” сериалининг инглиз тилидаги вариантини совға қилган, деган эди у. 

Дубльяжда актёрлар: Омон Абдураззоқов, Ойбарчин Бакирова, Санжар Саъдуллаев, Сайёра Юнусова ва Гулчеҳра Жамилова иштирок этган. Улар қаҳрамонларнинг руҳий ҳолатини ҳис қилиб овоз беришгани учун ҳам ҳозиргача сериал дубляжини кўпчилик эътироф этади.

Сериал бош қаҳрамонини ўзбек тилида гапиртирган актриса Сайёра Юнусова бу унинг илк марта сериал қаҳрамонига овоз бериш тажрибаси бўлганини эслайди. 

2000 йилга қадар ҳам кино ва мультфильм қаҳрамонларига овоз бериб юрганман. “Ошин” эса дубляждаги биринчи сериалим бўлиб, унда бош қаҳрамон Ошин ва бир қанча актрисаларнинг ўзбекча гапиришига ҳисса қўшганман. Биласизми, кўпинча бирор телесериалнинг овозлаштириш жараёнида аксарият актёрлар сизга ёрдам бергиси келмайди. Кичкина хато қилсангиз ҳам, бошқача нафас олиб қўйишади ёки қараши ўзгаради. “Ошин”га овоз бериш пайтида жуда қийналганман. Чунки бу катта қисмли фильм эди. Аммо атрофимдаги тажрибали дубляж актёрларининг қўллаб-қувватлаши туфайли вазифамни сифатли бажаришга интилганман. Айниқса, раҳматли Ойбарчин опам ҳамиша далда бўлиб, мени руҳлантириб турарди, деган эди актриса.  

Анора Гулямова тайёрлади