Кўпчилик мультфильм томоша қилади, лекин улар қандай яратилганини ҳамма ҳам билавермайди.
Анимация аниматикадан бошланади
Мультфильмнинг ўзини чизишдан олдин, унинг яратувчилари сценарийни аниматикага — бўлажак расмнинг видео эскизига айлантиради. Аслида, бу яхлит сюжет, композиция, йирик планлар, қаҳрамонлар ҳаракатини кўришга ёрдам берадиган видеоқоралама.
Рассомлар анимацияга асосланган расмни қайта чизиш билан шуғулланаётганда, мусиқачилар саундтрек яратиш устида ишлайдилар. Бу қисм тугагач, материал персонажларга овоз берувчи актёрларга ва визуал эффектларни қўшувчи график дизайнерларга топширилади. Мультфильмни яратишнинг сўнгги босқичида унга қадам товушлари, кўча шовқини ва бошқа эффектлар қўшилади.
Мультфильмлар узоқ вақт талаб этади
Мультфильмлар ишлаб чиқариш жараёнидаги кўплаб босқичлар туфайли жуда узоқ вақт талаб этади. Масалан, “Валли” 14 йил мобайнида яратилган, “Рапунзел” эса 8 йил вақт олган. Шаҳзоданинг сув париси томонидан қутқарилиши саҳнаси атиги икки дақиқа бўлса-да, уни чизиш бир йилдан ортиқ вақт талаб этган. Буюк Хаяо Миязаки эса йилига фақат 12 дақиқалик фильм яратишга қодир бўлган.
Албатта, сўнгги йилларда жараён сезиларли даражада тезлашган бўлса-да, барибир анча вақт талаб этади. Масалан, “Телба коинот” туркумини яратиш учун 2 ҳафтадан 4 ҳафтагача вақт кетади. Иш сценарий ва аниматик билан бошланади, кейин актёрлар дастлабки овозлаштиришни амалга оширади, шундан сўнг аниматор қўлда персонажларнинг ҳар бир ҳаракатини чизиб чиқади. Якуний босқичда мусиқа, товуш дизайни, олдиндан кўриш ва серия тавсифи яратилади.
Бармоқлардан тежаб қолиш
Мультфильм яратиш узоқ, синчковлик талаб қиладиган ва шу боис жуда қимматга тушадиган жараёндир. Бунинг устига, мультфильмлар доимо суперқаҳрамонлар ҳақидаги фильмлар ва бошқа фантастик асарлардан қимматга тушиб келмоқда. Тасаввур қилинг: “Рапунзел” учун “Аватар”га нисбатан 23 миллион доллар кўпроқ маблағ сарфланган — жами харажатлар 260 миллион долларни ташкил этган.
“Супер оила 2,“ “Дўрини излаб,“ “Ўйинчоқлар тарихи,“ “Махлуқлар уюшмаси” ва “Машиналар” фильмлари эса “Терминатор,“ “Доктор Стренж,“ “Круэлла”, шунингдек, “Дедпул” ва “Росомаха” фильмларининг бюджетидан ошиб кетди!
Ҳатто минималистик услубли оддий кўринишдаги мулцериаллар ҳам арзон эмас. Харажатларни бир оз бўлса-да камайтириш учун студиялар бир ҳийла ўйлаб топишди. Уолт Дисней ташаббусига эргашиб улар ўз қаҳрамонларининг бешинчи бармоғини чизишни тўхтатди — бу қарор миллионлаб доллар ва минглаб дақиқани тежашга ёрдам берди.
Математиклар, актёрлар, олимлар ҳам мультфильм ижодкорлари
Мультфильмлар устида нафақат сценарий муаллифлари, режиссёрлар ва аниматорлар, балки бошқа кўплаб мутахассислар ҳам меҳнат қилишади. Мисол учун, актёрлар кўпинча аниматорлар олдида қаҳрамонларнинг ҳаракатларини ва юз ифодаларини ҳақиқатга яқин тарзда акс эттириш мақсадида саҳналарни ижро этишади. Математиклар эса денгиз, қор ва сочларни ишончли тарзда жонлантиришга ёрдам берадиган дастурий таъминотлар яратишади.
Мультфильмлар устида ишлашда дубляж актёрларига алоҳида эътибор берилади. Кўпинча улар микрофон олдида персонажларнинг ҳаракатларини такрорлашига — югуриш, сакраш, рақс тушиш, ўйноқлаш ва ҳатто бақиришга тўғри келади.
Шу билан бирга, агар мультфильм мавзуси мураккаб бўлса, муаллифлар вақти-вақти билан шифокор ва олимлардан маслаҳат сўраб мурожаат қилишади. Мутахассислардан олинган маълумотлар ҳодисаларни ишончли тарзда тасвирлашга ва мультфильмларни чинакамига маърифий қилишга ёрдам беради.
Сўнгги факт
“Анимация” сўзи лотинчадан таржима қилинганда “жонлантириш, ҳаёт бериш” деган маънони англатишини билармидингиз? Демак, аниматорлар, аслида, жонсиз чизиқлар, шакллар ва рангларга жон бахш этиб, уларни дўстларга, ҳамроҳларга, устозларга ва севимли қаҳрамонларга айлантирадилар. Мультфильмларнинг сеҳри ҳам айнан шунда яширинган бўлса керак.
Изоҳ (0)