Ўзбекистон санъати ва маданияти ўзининг бой тарихига эга. Табаррук 80 ёшдан ошган актёр-актрисалар, режиссёрлар ва маданият соҳаси вакиллари ўз ижод маҳсуллари билан ўзбек ва жаҳондаги санъат ихлосмандларини ҳам ҳайратга солган. Уларнинг санъат асарлари, саҳнада ва экранда яратган образлари ҳақида эслаб, ёшликдаги ҳамда ҳозирги суратларини кўришингиз мумкин.
Гулнора Маваева 93 ёшда
Ўзбекистон халқ артисти Гулнора Маваева 1931 йилда туғилган. У Тамарахоним номидаги балет мактабини, Москвадаги хореография юртини тамомлаб, Алишер Навоий номидаги опера театрида ишлаган. У жаҳон балетларида, жумладан “Жизел”, “Оққуш кўли”, “Эсмералда” каби асарларда бош партияларни ижро этган. У ўзбек миллий рақсларини ҳам ижро этиб, 1953 йилда Бухарестда “Олтин медал”ни қўлга киритган. 1971 йилдан педагоглик фаолиятини бошлаган ва кўплаб истеъдодли раққосаларни тарбиялаган.
Раъно Мадраҳимова 89 ёшда
Раъно Мадраҳимова 1936 йилда Андижонда туғилган. Мактабда ўқиб юрган пайтида турли ҳаваскорлик тўгаракларида қатнашган. Ўрта Осиё давлат университетининг тарих факультетини тамомлаган. Талабалик даврида “Қутлуғ қон” фильмида рол ўйнаган. Сўнг дикторлик танловидан ўтиб, телевидениеда ишлаган. Шуҳрат Аббосов уни “Маҳаллада дув-дув гап” фильмида бош ролга таклиф қилган, бу фильмда архитектор Азиза ролини ижро этиб танилган.
Актрисанинг турмуш ўртоғи академик Телман Ражабов. Ҳозирда улар фарзандлари ва набиралари билан Тошкентда яшамоқда.
Али Ҳамроев 88 ёшда
Таниқли ўзбек кинорежиссёри Али Ҳамроев 1937 йилда Тошкентда актёр ва сценарийлар муаллифи Эргаш Ҳамроев оиласида туғилган. Унинг онаси Анастасия Тарасич ҳам киностудияда ишлаган. Эргаш Ҳамроев ўғлини 3 яшарлигида киностудияга олиб келган. Шу тариқа ҳозиргача Али Ҳамроев киностудиясисиз ўз ҳаётини тасаввур қилолмайди. Бундай ижодий муҳит унинг келажакда машҳур кинорежиссёр бўлиб етишишида етакчи омил бўлди.
У ижодий фаолияти давомида 18 та бадиий ва 20 та ҳужжатли фильм яратди.
— Менинг бобом ва отам риштонлик тожиклардан, онам украиналик, паспортимда эса ўзбек деб ёзилган. Ахир бунинг бирор аҳамияти йўқ-ку! Мендан “Сиз Италияда яшадингиз, энди Россияда ижод қиляпсиз. Сиз ўзингизни қаерлик режиссёр деб ҳисоблайсиз?” деган саволга доимо “Мен ўзбек режиссёри эдим, ўзбек режиссёриман ва ўзбек режиссёрлигимча қоламан”, дея жавоб қайтараман дейди Али Ҳамроев.
Гулсара Ёқубова 88 ёшда
Ўзбекистон халқ артисти Гулсара Ёқубова 1937 йил 15 апрелда Урганчда туғилган. 1965–2003 йилларда Ўзбекистон давлат филармониясининг “Лазги” ашула ва рақс ансамбли солисти бўлиб фаолият юритган ва 1968 йилда мазкур ансамблга раҳбарлик қилган.
Гулсара Ёқубова нафақат бетакрор овоз соҳиби, балки саҳнада “Тошболта ошиқ”да Саломат, “Кўнгил қизлари”да Жонсулув, “Ишқинг билан”да Шакарой каби ролларни ижро этган маҳоратли актрисадир. У 35 йилдан ортиқ ижодий фаолияти давомида ўзбек миллий санъати ривожига катта ҳисса қўшган.
Галина Мелникова 88 ёшда
Олий тоифали сухандон Галина Мелникова 1936 йил 23 декабрда Тошкентда туғилган. У телевидениедаги фаолиятини 1956 йилда бошлаган. Кўп йиллар давомида “Ахборот” информацион дастурида бошловчилик қилган, турли тантанали маросимларни олиб борган.
Яна у “Радио Терра” сухандони бўлиб, байрам концертлари, репортажлар ва ҳукумат концертларини олиб борган. “Дўстлик” ордени, “А.С. Пушкин” медали билан тақдирланган ва “Олтин қалам” миллий мукофотига лойиқ топилган.
Ёқуб Аҳмедов 87 ёшда
Ёқуб Аҳмедов 1938 йил 3 январда Наманганда туғилган. Тошкент театр ва рассомлик санъати институтини тамомлаб, 1958 йилдан Ҳамза номидаги Ўзбек Давлат академик драма театри актёри, 1992 йилдан эса директор бўлиб фаолият юритган.
У 30 дан ортиқ кинофильмда образлар яратган, жумладан, “Ганга қизи”, “Ўтган кунлар”, “Ҳамза” каби фильмларда рол ўйнаган. Шунингдек, “Ўзбекфильм” киностудиясида 400 дан ортиқ фильмга овоз берган. “Алишер Навоий”, “Улуғбек хазинаси”, “Диёнат”, “Гирдоб”, “Ичкуёв” каби видеофильмларда ҳам бош ролларни ижро этган. Ҳозирда ижодий фаолиятини тугатган ва фарзандлари билан умргузаронлик қилмоқда.
Роза Каримова 87 ёшда
Ўзбекистонда хизмат кўрсатган артист Роза Машуровна Каримова таниқли ўзбек ва совет санъаткори. У Абдулла Қаҳҳор номидаги сатира театрида фаолият юритган. “Меҳнат фахрийси” ва “Маданият ва санъат фидокори” кўкрак нишонлари соҳибаси. У Ўзбекистон халқ артисти марҳум Эргаш Каримовнинг аёлидир.
Рихси Иброҳимова 87 ёшда
Рихсихон Иброҳимова 1937 йил 29 декабрда Тошкент шаҳрида таваллуд топган. У Тошкент театр ва рассомчилик олийгоҳида таҳсил олган. Актриса кинога 1967 йилда суратга олинган “Интеграл” номли фильмдаги роли билан кириб келган. У фаолияти давомида “Келинлар қўзғолони”, “Шум бола” ва “Юзсиз” каби ўнлаб бизга таниш фильмларида суратга тушган.
Рихси Иброҳимовани ҳаёти давомида муваффақиятлари билан бир қаторда, қора кунлари ҳам кўп бўлган. У Чернобилдаги АЭС ҳалокатларини бартараф этиш вақтида, бир гуруҳ санъаткорлар билан ўша ерда концерт дастурида қатнашган. Тошкентга қайтгач унинг нурланиш билан касалланганлиги маълум бўлган ва бунинг оқибатида, бир нечта оғир жарроҳлик операцияларини бошидан ўтказган.
Қамара Камолова 86 ёшда
Қамара Камолова 1938 йили Бухоро шаҳрида туғилган. 1982 йилда “Ўзбекистонда хизмат кўрсатган санъат арбоби” унвонига эга бўлган. “Аччиқ данак”, “Ўзганинг бахти”, “Эртага чиқасанми?”, “Набирамиз милицияда ишлайди”, “Бўлмаган нарса ҳақида” каби фильмлар муаллифидир. Қамара Камолова фильми Германиядаги халқаро кинофестивал совриндори бўлди.
Дилбар Исмоилова 85 ёшда
Дилбар Исмоилова 1938 йил 11 августда Тошкентда туғилган. Ўзбекистон халқ артисти бўлган марҳум актриса, “Фанмонбиби” Зайнаб Садриеванинг қизидир. У театр саҳнасида яратган образлари, “Дийдор” спектаклидаги Шарқия, “Қутлуғ қон”даги Гулсум, “Заҳарли ҳаёт”даги Сора, Саид Аҳмаднинг “Келинлар қўзғолони” ва “Фармонбиби аразлади” юмористик комедияларидаги Лутфи роллари орқали эл суйган санъаткорга айланган.
Собиржон Раҳимжонов 84 ёшда
Актёр Собиржон Раҳимжонов томошабинларга “Опа-сингиллар” сериалидаги меҳрибон қайнота роли билан танилган. 81 ёшда бўлишига қарамай, у ҳали ҳам таклиф этилган ролларни рад этмайди ва дубляжда иштирок этади. 11 йил олдин шифокорлар унинг ҳаёти ниҳоясига етиб бораётганини айтган, аммо ундай бўлмади.
— 70 ёшимда биринчи марта касалликдан азият чекдим. “Опа-сингиллар” сериали суратга олиш жараёнида қулоғим орқасида тугун пайдо бўлди. Таҳлиллар саратон касаллигини кўрсатди, жарроҳлик амалиёти хавфли деб топилди. 14 та кимётерапия ва 18 маротаба нур амалиёти олдим. Касалхонадаги беморларнинг аҳволини кўриб, Аллоҳга шукр айтдим. Сериалга қайтиб келгач, актёрлар мени юпатишга ҳаракат қилишди. Даволанишлар самара бериб, дарддан халос бўлдим. Руҳият муҳим, инсон умидсизликка тушмаслиги керак, дейди актёр.
Наима Пўлатова 84 ёшда
Наима Пўлатова 1939 йил 4 июнда Тошкентда туғилган. 1963 йилда Тошкент театр ва рассомликчилик олийгоҳини тамомлаб, Муқимий номидаги Ўзбекистон давлат мусиқали театрида ишлай бошлаган. У 100 дан ортиқ спектаклларда бош ролларни ижро этган ва 1977 йилда “Ўзбекистонда хизмат кўрсатган артист”, 1997 йилда “Ўзбекистон халқ артисти” унвонларига эга бўлган. Унинг фильмографиясида “Келинлар қўзғолони”, “Тўйлар муборак”, “Ота” каби фильмлар мавжуд. Шунингдек, 20 дан ортиқ қўшиғи Ўзбекистон радиосида эфирга узатилган.
Хайрулла Саъдиев 84 ёшда
Хайрулла Саъдиев 1940 йил 6 декабрда Тошкент шаҳрида таниқли актёр Ҳабиб Саъдиев оиласида туғилган. У ўрта мактабни тамомлагач, Тўқимачилик институтига ўқишга кирган. Аммо кейинчалик Тошкент театр ва рассомчилик олийгоҳининг актёрлик бўлимига ҳужжат топширган. Ўқишни тамомлаб, Ёш томошабинлар театрида фаолиятини бошлаган ва бир неча болалар спектаклларида иштирок этган. 1969 йилда “Ой бориб омон қайт” фильмида эпизодик ролда кинога кирган. “Кулол ва Хурмача”, “Алпомиш”, “Шайтанат”, “Таъзиядаги тўй” каби фильмларда суратга тушган. 1986 йилдан бошлаб “Ўзбекистон давлат сатира театрида” фаолиятини давом эттирган. Курсдоши бўлган Раъно исмли қиз билан оила қурган, аммо унинг вафотидан кейин Малика исмли аёл билан турмуш қурган. Хайрулла Саъдиевнинг уч ўғил ва бир қиз фарзанди бор.
Мукамбар Раҳимова 84 ёшда
Актриса 1941 йилда Тошкентда туғилган. У Тошкент театр ва рассомчилик институтини “актёрлик маҳорати” ва режиссёрлик йўналишлари бўйича тамомлаган. 1964 йилда “Ўзбекфильм” киностудиясига келган. 13 ёшидан дубляжлар, телекўрсатувлар ва радиожурналларда иштирок этган.
Мукамбар Раҳимова “Оловли йўллар”, “Ёлғиз ёдгорим”, “Лайлак келди, ёз бўлди” каби фильмларда рол ўйнаган. У бир қанча радио-постановкалар режиссёри бўлиб, 2002 йилда Ўзбекистон халқ артисти унвонига сазовор бўлган.
Насиба Қамбарова 83 ёшда
Ўзбекистонда хизмат кўрсатган артист Насиба Қамбарова кўп йиллар мобайнида Ўзбекистон телевидениесида сухандон бўлиб ишлаган.
Насиба Қамбарова телевидениеда эрта тонгдан ярим тунга қадар меҳнат қилган. Ғазал кечалари радиога бориб, ғазаллар ўқиган. Сухандонлар Қодир Махсумов ва Туйғуной Юнусхўжаева билан ишлашганини меҳр билан ёдга олади. Ўктам Жобиров эса биринчи устозларидан бўлиб, унга кўплаб маслаҳатлар берган. “Видеоёзувлар бўлмаган даврда бир кунда бир неча кўрсатув ёзиларди. Бир сафар бош оғриғи сабабли режиссёрни эшитадиган микрофонни босиб юборганман ва сўзларим бутун Ўзбекистон эшитган. Эртасига раҳбарлар ҳазиллашиб, сени кўриш учун томошабинлар бош оғриғи дориси олиб келибди”, деб айтишган дейди сухандон.
Насиба Иброҳимова 83 ёшда
Олий тоифали диктор Насиба Иброҳимова1942 йил 1 майда Тошкентда туғилган. 3-синфлигидаёқ Ўзбекистон радиосида эшиттиришлар олиб борган. 200 дан ортиқ ҳужжатли ва бадиий фильмларга овоз берган. 1964 йилда Тошкент давлат университетининг Журналистика факультетини тамомлаган. 25 йил давомида турли лавозимларда, Ўзбекистондаги партия комитетларида, Маданият вазирлиги ва Давлат санъат музейида фаолият юритган. У UNESCO томонидан чоп этилган “ХХ аср аёллари” китобига киритилган. У 1976 йилда “Ўзбекистон ССРда хизмат кўрсатган артист”, 1991 йилда “Меҳнат фахрийси” медали, 2002 йилда “Дўстлик ордени” билан мукофотланган.
Азиза Бегматова 81 ёшда
Актриса 1943 йил 7 сентябрда Сурхондарё вилоятида туғилган. Болалиги уруш йилларига тўғри келган ва болалар уйида тарбия топган. Мактабни тамомлаб, Тошкент театр ва рассомчилик санъати олийгоҳида таҳсил олган. Фаолиятини Аброр Ҳидоятов номидаги Ўзбек давлат драма театрида бошлаган. 50 дан ортиқ фильм ва спектаклларда иштирок этган, шунингдек, бир нечта рус фильмларида ҳам суратга тушган. Ўзбек томошабинларига “Чеча” номли спектаклдаги Чеча образи орқали танилган. У “Ўзбекистон халқ артисти” унвони билан тақдирланган ва ҳозирги кунга қадар актрисалик фаолиятини давом эттирмоқда.
Ноила Тошкенбоева 81 ёшда
Ноила Тошкенбоева 1943 йил 22 сентябрда Тошкентда туғилган. 1965 йилда Тошкент театр ва рассомчилик санъати институтини тамомлаб, курсдошлари билан Самарқанд театрига ишга юборилган. У ерда курсдоши Асрор Тошкенбоев Ноилага турмуш қуришни таклиф қилган. Актриса “Шум бола”, “Суюнчи”, “Тўйлар муборак”, “Келинлар қўзғолони” каби фильмларда роллар ижро этган. Дубльяж соҳасида 1000 дан ортиқ фильм, мультфильм ва сериалларга овоз берган, айниқса “Эсмералда”, “Аёл”, “Парчаланган юраклар” каби сериаллардаги ишлари эътироф этилган.
Муҳаббат Шамаева 80 ёшда
Муҳаббат Шамаева (асл исми Люба) 1944 йил 12 май куни Бухорода туғилган. Ижодий фаолиятини Ижодий фаолиятини ҳам Бухорода бошлаган. 1963-1991 йилларда эстрада-симфоник оркестрида якка хонанда бўлган. 1990 йиллардан Нью-Ёркдаги “Тикланиш” Бухоро яҳудийлари мусиқали театрида ишлайди. Рэпертуарида ўзбек халқ қўшиқлари ва бошқа халқларнинг қўшиқлари мавжуд. У фаолиятида давомида Европа ва Осиёда кўплаб гастрол сафарларида бўлган. 2015 йилда Бутунжаҳон мусиқа институтида чиқиш қилган ва 2018 йилда Тошкентда ва Шаҳрисабзда концерт берган.
У Ўзбекистон ССРда хизмат кўрсатган марҳум артист Илёс Mallаевнинг турмуш ўртоғи бўлган. Уларнинг Наргиза ва Раж Mallаев исмли фарзандлари ҳам хонандалик йўлини танлаган. Ҳозирда Муҳаббат Шамаева оиласи билан Нью-Ёркнинг Queens туманида яшайди ва марҳум турмуш ўртоғи асос солган “Мақом” ансамблида фаолият юритади.
Ражаб Адашев 80 ёшда
Ражаб Адашев 1944 йил 15 июлда Самарқанд вилоятининг Ургут туманида туғилган. Мактабни тамомлагач, қурилиш ташкилотларида ишлаган ва бўш вақтларида Ургут халқ театрида роллар ижро этган. 1964 йилда “Ўзбекфильм” киностудиясида актёр бўлиб ишлай бошлаган, 1970 йилда Тошкент театр ва санъат институтини тамомлаган. Актёрлик фаолияти давомида 60 дан ортиқ фильмда суратга тушган. “Абдуллажон” фильмидаги образи учун “Энг яхши эркак роли” мукофоти биалн тақдирланган. 1997 йилда Ўзбекистонда хизмат кўрсатган артист, 2010 йилда эса “Ўзбекистон Халқ артисти” унвонини олган.
Ўзбек санъати дарғаларининг умрлари узоқ бўлишини тилаб қоламиз!
Изоҳ (0)