Гап “Нечжа-2” ёки “Нечжа Аждарҳо қиролини енгади” ҳақида кетмоқда. Хитойда мультфильм 2,054 миллиард доллар йиғди, Хитойдан ташқари бозорларда эса — 31 миллион доллар. Бу ҳафта охирида “Нечжа-2” “Юлдузлар жанги”нинг еттинчи қисми, “Куч уйғонади”нинг даромадини ортда қолдирди. Айрим таҳлилчиларнинг фикрича, мультфильм “Титаник”нинг касса тушумини ҳам ортда қолдириши мумкин.
Қайд этиш жоизки, Хитойда “Нечжа-2”га 300 миллиондан ортиқ чипта сотилган: бу АҚШ, Хитой ва Ҳиндистондан ташқари ҳар қандай давлатнинг аҳолисидан кўп. Deadline маълумотларига кўра, мультфильмни Хитой аҳолисининг 21 фоизи кўрган.
Таҳлилчиларнинг фикрича, “Нечжа Аждарҳо қиролини енгади” мультфильмининг муваффақиятига бир нечта сабаб бор. Биринчидан, 2019 йилда чиққан биринчи қисми ҳам муваффақиятли бўлган. Иккинчидан, “Нечжа-2” намойиш этилиши биланоқ омадли бўлган, чунки мультфильм премераси Хитой Янги йили мавсумига тўғри келган. Учинчидан эса, мультфильм маълум бир демографик гуруҳга (кўпинча Осиё релизларида бўлганидек) эмас, балки кенг аудиторияга мўлжалланган.
“Нечжа Аждарҳо қиролини енгади” Хитой мифологиясига асосланган. Мультфильм сюжетига кўра, асосий қаҳрамонлар ўз таналарини қайтариб олиши, Ао Гуан Аждарҳо қиролига қарши курашиши ва Чентангуан қалъасини вайрон қилишдан сақлашлари керак.
Изоҳ (0)