“Моана 2” анимацион фильми премерасидан сўнг саккиз ҳафта ичида дунё бўйлаб бир миллиард доллардан ортиқ тушумларга эга бўлди. Variety нашри маълумотларига кўра, “Моана 2” 2024 йилда мазкур кўрсаткичга етган Дисней мультфильмларининг учинчисидир.
Анимацион фильм АҚШда 445 миллион доллар, бошқа хорижий давлатларда эса 567 млн доллар ишлаб топди. “Моана 2” фильмига чипталар сотуви дастлабки башорат қилинган кўрсаткичдан (135—145 миллион доллар) ошиб кетди. Шунингдек, анимацион фильм премера кунида 57 миллион доллар ишлаб, тарихдаги энг яхши прокат натижаларидан бирини кўрсатди.
“Моана 2” экранларга чиққандан беш кун ўтгач, кино прокатида 225 млн доллар йиғди. Шу тариқа лойиҳа аввалги рекорд — “Музюрак 3” (125 миллион доллар) ни янгилади.
Бундай муваффақият “Моана 2”ни Диснейнинг бошқа машҳур лойиҳалари (“Бошқотирма”, “Дедпул ва Росомаха”) қаторидан жой олишига сабаб бўлди. 2024 йилда чиққан бошқа рақобатчи компания — Illumination Entertainment томонидан суратга олинган “Яхши бўлиш осонми” фильми миллиард долларлик кўрсаткичга ета олмади. Унинг касса даромадлари 969 миллион долларни ташкил этган эди.
Танқидчиларнинг бир-бирига зид турли баҳоларига қарамай, “Моана 2” томошабинлар томонидан илиқ кутиб олинди. Лойиҳа кетма-кет етти ҳафта ичида АҚШ кино прокатининг энг яхши бешталигидан ўрин олди.
Аввалроқ Аниматор Бак Вудолл Диснейни плагиатда айблаб, компанияни судга берган эди. Бунга “Моана” ва “Моана 2” фильмларида Вудоллга тегишли элементлар “Баки” мультфильмида ҳам борлиги сабаб бўлган эди.
Изоҳ (0)