28 январь куни “Узуклар ҳукмдори” ва “Ҳоббит” фильмларининг юлдузи 44 ёшга тўлди. Хўш, севимли актёр ҳозирда нималар билан шуғулланмоқда?
Қўрқинчли фильмлар ишлаб чиқаради
Бунга ишониш қийин, аммо дунёдаги энг машҳур фантастик фильмлар юлдузи кўп йиллардан бери мажозий маънода қўрқинчли фильмлар ҳавосидан нафас олади. Бу иштиёқ унда биринчи марта 2012 йилда “Маняк” фильмида суратга тушганидан кейин пайдо бўлди. 1980 йилда худди шу номдаги слешернинг ремейки бўлган “Маняк” фильмида у ҳоббитг мутлақо ўхшамайдиган, шизофренияга чалинган шафқатсиз серияли қотил Фрэнк Зито ролини ўйнади.
Актёрлик — турли шахсларни тасвирлай олиш, дегани шу бўлса керак. Менга келсак, доим олдинги ролларимдан фарқ қиладиган образларни ўйнашга қизиқиб келганман. Бунинг турли сабаблари бор. Биринчидан, бу осон эмаслиги, шунингдек, мен бутунлай бошқа жанрларнинг мухлиси эканлигим учун, деганди актёр.
Гарчи “Маняк” фильми прокатда камтарона натижага эришган бўлса-да, Вуд бу турдаги фильмларга кўпроқ эътибор беришга қарор қилди. 2010 йилда актёр Woodshed продюсерлик компаниясининг асосчиларидан бири бўлган. Кейинчалик у SpectreVision деб ўзгартирилди ва кам бюджетли қўрқинчли фильмлар ишлаб чиқаришга ихтисослашди. Ўшандан бери Вуд продюсерлик билан фаол шуғулланиб келмоқда ва бир қатор даҳшатли фильмлар яратилишига ҳисса қўшди. Жумладан, “Лаънатланган душман” (2020), “Бошқа дунёдан ранг” (2019). 2025 йилда Стивен Кинг ҳикояси асосида суратга олинган “Маймун” даҳшатли фильми чиқади.
Дижейлик билан шуғулланади
Актёрнинг яна бир ғайриоддий қизиқиши — дижейинг. Элайжа мусиқага кўпдан бери қизиқарди ва у “Узуклар ҳукмдори”да рол ўйнаган пайтларидаёқ дижейинг билан оз-оздан шуғуллана бошлаган. У клублар ва тадбирларда тез-тез чиқиш қилади ва ҳатто 2005 йилда Simian Records мусиқий лейблига асос солган. Тўғри, бу борада иши унча юришмади, лекин дижей Вуд ҳанузгача ўз устида ишлашда давом этмоқда.
Актёрлик ва мусиқани таққослаб, Элайжа мусиқа унинг учун ўзини намоён қилишнинг ҳақиқий усули эканлигини тан олади, чунки дижейинг унинг бошқа соҳалардаги фаолияти билан ҳеч қандай алоқаси йўқ.
Мультфильм ва видеоўйинларга овоз беради
Ажабланарлиси шундаки, актёрда ижодий талантнинг мутлақо бошқа қирралари мавжуд. Масалан, Элайжа қўрқинчли фильмларни яхши кўришига қарамай, анимацион фильмларга завқ билан овоз беради. Унинг дубляждаги машур ишидан бири — “Қувноқ оёқчалар” (2006) тўлиқ метражли мультфильмидаги рақсга тушадиган пингвин боласи Мамблга овоз бергани бўлди.
2010 йилда Вуд мультфильмнинг сиквелида яна шу персонажини овозлаштирди. Бундан ташқари, “9” номли пост-апокалиптик анимацион фильм, “Тўсиқнинг нариги томонида” (2014) ва “Юлдузлар жанги: қаршилик” (2018) анимацион сериаллари устида ишлади. Вуд мультфильмлардан ташқари, видеоўйинлар қаҳрамонларига ҳам овоз беради.
Илк бор ота бўлди
Актёр шахсий ҳаёти ҳақида гапирмасликни афзал кўради. Бироқ актёр ҳар доим ғайриоддий қизлар билан учрашгани маълум — аввал немис актрисаси Франка Потенте, кейин Гогол Борделло гуруҳи барабанчиси Памела Расин билан. 2018 йилда ОАВ актёрнинг ўша пайтда турмушга чиққан даниялик продюсер Метте-Мари Конгсвед билан ишқий муносабати ҳақида ёза бошлади. Вақт ўтиши билан бу шунчаки миш-миш эмаслиги маълум бўлди: улар ҳақиқатан ҳам бирга бўлиб, ўғил ва қиз фарзанднинг ота-онаси бўлишди. 2025 йил бошида Элайжа ва Метте-Марининг яширин тўйи ҳақида маълумот пайдо бўлди.
Бугунги кунда Элайжа Вуд 20 йил олдинги кўринишига ўхшамаса-да, кўпчилик мухлислар учун ўша самимий ҳоббит бўлиб қолмоқда.
Уни Фродо деб аташса, хафа бўлмайди
Актёрни мунтазам равишда машҳур роли билан эслашади — масалан, мухлислар уни баъзан Фродо деб аташади. Лекин бу уни умуман хафа қилмайди.
Ҳа, бу ролни ташриф қоғозим, десаям бўлади. Нима бўлганда ҳам, бу менинг энг кўзга кўринган ишим. Мен маданий жиҳатдан кўплаб жабҳани қамраб оладиган кинонинг бир парчасига айландим, шунинг учун бу рол ҳар доим ҳаётимнинг бир қисми бўлиб қолади.
Изоҳ (0)