Янги йил кириб келишидан аввал кўплаб инсонлар оила даврасида байрамона кайфият улашувчи фильмларни томоша қилишга одатланиб қолган. Қуйида 2024 йилда суратга олинган қишки асосий байрам руҳидаги янги фильмларни ҳавола этамиз.
“Ўша Рождество” (режиссёр Саймон Отто)
Netflix Янги йил арафасида бошқа стриминг хизматларига қараганда айнан анимацион фильмлар бўйича фаолроқ ишламоқда. Онлайн кинотеатр ҳар йили ўз обуначиларига октябрь ойидан бошлаб ўнлаб Янги йил ҳақидаги мелодрамалар, оилавий комедиялар ва мультфильмларни тақдим этди. 2024 йил охирида режиссёр Саймон Отто ва сценарий муаллифи Ричард Кертис “Ўша Рождество” фильмини экранларга намоёш қилди.
Фильмдаги воқеалар Янги Зеландиянинг Веллингтон шаҳрида бўлиб ўтади. Рождество арафасида кучли қор бўрони келади ва маҳаллий аҳолининг аксарият қисми бир-биридан узилиб қолади. Табиий офат аҳоли байрам арафаси кунини ёлғизликда ўтказиш, эски хатоларини қайта кўриб чиқиш ва яхшироқ одам бўлишига туртки беради.
Мазкур мультфильм байрам баҳонасида узоқлашган қалбларнинг бирлашиши ҳақидаги асар бўлиб, унга хонанда Эд Ширан махсус саундтрек ёзган.
“Қўл юки” (Режиссёр Жауме Колет-Серра)
Лос Анжелес, Рождество куни. Итан Копек исмли аэропорт хавфсизлиги ходими узоқ вақтдан бери кечки навбатчилиги тугашини ва ҳомиладор аёли билан биргаликда янги йилни нишонлашни интиқлик билан кутади. Лавозими кўтарилишини мақсад қилган Копек раҳбариятдан мураккаброқ вазифа берилишини ва уни интроскоппа қўйишни сўрайди. Кўп ўтмай, Итан билан номаълум шахс боғланади ва зудлик билан интроскоп орқали тақиқланган юкларни ўтказишни талаб қилади, акс ҳолда унинг севгилиси вафот этишини айтади. Икки ўт орасида қолиб кетган стажёр ишчи жиноятчиларни қандай тўхтатиш ва минглаб америкаликлар учун қадрли бўлган Рождествони сақлаб қолиш масаласини тез ҳал қилиши керак бўлади.
“Қадрли Санта” (режиссёр Бобби Фаррелли)
Фильмнинг бош қаҳрамони Лиам исмли бола бўлиб, у мактабда ҳам, уйда ҳам қийинчиликларга дуч келиб юради. 11 ёшли ўсмир ёқтирган қизининг эътиборини жалб қила олмайди, дўст ҳам орттира олмайди, ота-онаси билан эса доимо жанжал қилади. Шунда муаммоларнинг ечими сифатида бошқа йўл — Қорбобога хат ёзишга қарор қилади. Аммо Лиам дисграфиядан азият чеккани туфайли хатда Санта ўрнига сатан деб ёзади ва мактубни Қорбобога эмас, тасодифан Шайтонга юборади . У шу заҳоти Лиам олдига шохли одам қиёфасида (Жек Блек) пайдо бўлади ва йигитга учта тилагини бажо келтиришини айтади. Шундан сўнг ёш боланинг руҳини дўзахга олиб кетишга ваъда беради.
Фильмдаги кулгили кадрлар, ҳазилларнинг барчаси Рождество арафасида дўстлик, севги ва оилани сақлаб қолиш ҳақидаги анъанавий қадриятларга тўла.
“Миссия: Қизил” (режиссёр Жейк Кездан)
Янги йилга ҳали бир ой бор, аммо “Қизил” лақабли Сантани ўғирлаб кетишади. Рождествони қутқариш учун Шимолий қутб хавфсизлик хизмати бошлиғи ва бош овчиси (Дуэйн Жонсон ва Крис Эванс) бирлашади ва хавфли сафарга отланади. Уларнинг даврасига мафтункор ва хавфли Люси Лю ҳам қўшилади.
Фильм АҚШда 15 ноябрда чиқди ва жуда паст натижаларни кўрсатди. 250 миллион долларлик бюджетли фильм дебют кунида атиги 11 миллион доллар йиғди. Бутун дунё бўйлаб касса йиғими ҳозирда 175 миллион долларни ташкил қилади. Кўрсаткич ўсишда давом этмоқда, чунки фильм ҳали ҳам кинотеатрларда намойиш этилмоқда.
Фильмда Ж.К Симмонс (“Ўргимчак одам”), Люси Лю (“Чарли фаришталари”), Кристофер Ҳивю (“Тахтлар ўйини”) ва бошқа таниқли актёрлар иштирок этган.
Изоҳ (0)