Аниматор Бак Вудолл Disney’ни плагиатда айблаб компанияни судга берди. Унинг сўзларига кўра, 2016 йилда Walt Disney Animation Studios томонидан чиқарилган “Моана” ва 2024 йилги “Моана 2” фильмларида Вудоллга тегишли “Баки” мультфильми билан ўхшаш кўплаб элементлар мавжуд.
Мазкур мультфильмлар сюжети ва ундаги турли деталлар ҳақиқатан ҳам ўхшаш: иккала фильмда ҳикоялар қадимги Полинезия қишлоғида содир бўлади. Уларда хавфли саргузаштларни бошдан кечирадиган ўсмирлар ҳақида маълумот берилади. Иккала асарда ҳам қаҳрамонлар ҳайвон кўринишидаги руҳларни учратишади. Шунингдек, рамзий тумор билан боғлиқ эпизод, бош қаҳрамоннинг татуировкали ярим маъбуд билан учрашуви, тоғнинг ичида яширинган улкан жонзот каби деталлар ҳам “Баки” ва “Моана” мультфильмларида бирдек мавжуд.
Вудоллнинг сўзларига кўра, ўзининг “Баки” анимацион фильми сценарийсини 2000 йилда Мандевилле Фильмсънинг собиқ ишчиси, ҳозирда DreamWorks Animation компаниясининг ишлаб чиқариш бўлими бошлиғи Женни Марчикка кўрсатган. У Вудоллдан фильм билан боғлиқ материалларни, жумладан, персонажлар дизайни, ҳикоялар сюжети ҳақида сўраган ва гўёки лойиҳани амалга ошириш учун қўшимча маълумотлар кераклигига ишонтирган. Ўша пайтда Мандевилле компанияси Дисней билан ҳамкорлик ўрнатган эди.
Аҳамиятли жиҳати шундаки, аввалроқ Бак Вудолл бу ҳақда судга арз ҳам қилган, аммо “Моана” фильми экранларга чиққанига анча вақт бўлганидан кейин бу ишни амалга оширгани унга панд берган.
Вудолл Диснейдан 10 миллиард доллар товон пули ундиришга умид қилмоқда, деб ёзади Тҳе Hollywood Репортер. Қайд этиш лозимки, “Оскар” мукофотига номзод бўлган “Моана” 643 миллион доллар даромадга чиққан, унинг иккинчи қисми эса деярли 1 миллиард доллар ишлаб топган.
Аввалроқ “Моана” анимацион фильмининг иккинчи қисми жаҳон кассаларида 221 миллион доллар йиғиб, Диснейнинг сўнгги беш йил ичида энг юқори даромад келтирган анимацион лойиҳасига айланган эди. Мультфильм касса йиғимлари бўйича етакчи бўлган 2019 йилги “Музюрак 2”ни ортда қолдирган эди.
Изоҳ (0)