Франция президенти Эммануэл Макрон Европа давлатлари Украина можаросини ҳал қилиш жараёнида фаол иштирок этиши кераклигини таъкидлади. Бу ҳақда RBC хабар берди.
Макроннинг тегишли баёноти у Буюк Британия бош вазири Кир Стармер, Германия канцлери Фридрих Мерс ва Украина президенти Владимир Зеленский билан телефон орқали мулоқотдан сўнг эълон қилинган.
“Украинанинг келажаги украиналикларсиз ҳал этилиши мумкин эмас. Бу масалада европаликлар ҳам иштирок этиши шарт, чунки гап уларнинг хавфсизлиги ҳақида кетмоқда”, деб ёзди Макрон ўзининг Х саҳифасида.
Унга кўра, Париж, Берлин ва Лондон Украинани қўллаб-қувватлашда давом этади ва бу борадаги ҳаракатлар “истак билдирган давлатлар коалицияси” доирасида олиб борилади.
Трамп ва Путин 15 август куни учрашади
Маълум бўлишича, АҚШ президенти Дональд Трамп ва Россия президенти Владимир Путин 15 август куни Аляскада учрашади. Россия президентининг ёрдамчиси Юрий Ушаковнинг айтишича, икки раҳбар Украинадаги урушни тинч йўл билан ҳал қилиш бўйича узоқ муддатли режаларни муҳокама қилади.
НАТО давлатлари Трампдан хавотирда
Axios нашрининг ёзишича, ушбу учрашув олдидан АҚШ, Украина ва Европанинг бир қанча етакчи расмийлари шу ҳафтанинг охирида Британияда йиғилиб, умумий позицияни келишиб олишга ҳаракат қилмоқда. Нашр манбаларига кўра, Киев ва баъзи НАТО иттифоқчилари Трамп Путиннинг ўт очишни тўхтатиш ва ҳудудларни алмаштириш бўйича таклифига бир томонлама рози бўлишидан хавотирда. Улар Трамп Европа томонининг фикрини инобатга олмайди, деб ҳисобламоқда.
Изоҳ (0)