Netflix платформасида “Калмар ўйини” сериали намойиш этилганидан кейин лойиҳа мазкур стриминг тизими тарихидаги энг машҳур шоулардан бири бўлди. У сериаллар рейтинги рекордларини янгилади ва глобал поп маданиятининг бир қисмига айланди. Аммо ким ўйлабдики, сериалнинг энг кўп муҳокама қилинадиган қаҳрамонларидан бири... шакарли печенье бўлади деб?
Далгона номли ушбу анъанавий корейс ширинлиги тўсатдан бутун дунёга машҳур бўлди. Миллионлаб томошабинлар бу ширинлик ўзи нима учун машҳур сериалга тушиб қолгани ҳақида турли саволлар бера бошлади.
Оддий ширинлик янгича талқинда
Далгона – Кореяда узоқ йиллардан бери машҳур бўлган анъанавий ширинлик бўлиб, унинг таркиби жуда оддий: шакар ва сода. Лекин “Калмар ўйини” сериалида у болаликдаги ўйиндан кўра кўпроқ нарсани англатарди. Иштирокчилар печеньедаги белгиланган шаклни бузмасдан кесиб олишлари керак эди. Акс ҳолда, улар ўйиндан чиқариларди — яъни ҳаётдан маҳрум бўлишарди.
Аслида, далгона ширинлиги Жанубий Кореянинг уруш давридаги энг кўп сотилган печенье эди. 60 йилларда болалар учун шоколад ёки музқаймоқ каби қандолат маҳсулотлари йўқ эди, далгона эса арзон нархга пулланар ва кўпинча мактаблар ташқарисидаги кичик расталарда сотилар эди. Ўша даврда ҳам худди шундай ўйин бўлган: агар печеньедаги шаклни синдирмай ажрата олсангиз, иккинчиси бепул берилар эди.
Сериал режиссёри Хван Донг Хёк ҳам ўша даврдаги камбағал Сеулда ўсган ва кўпинча ширинлик ўйинида доим ғалаба қозонган. Мураккаб шаклларни кесиб олиш учун у игнани олов билан қиздирган ва ширинликни юмшоқроқ қилиш учун печеньени ялаган. “Калмар ўйини”да ҳам қаҳрамонлар қандли ширинликдан соябонлар, юлдузлар ва учбурчакларни ажратишга ҳаракат қилади.
Ҳақиқий усталар томонидан тайёрланган ширинликлар
Ушбу саҳнани суратга олиш учун ижодкорлар ҳақиқий ошпазлар — Лим Чанг Чжу ва унинг рафиқаси Чон Чжон Сунни таклиф қилишган. Эр-хотин кўп йиллардан бери Сеулдаги дўконда далгона тайёрлаб сотади. Уларга уч кун ичида 400 дан ортиқ печенье пишириш вазифаси юклатилган.
Ҳозирда уларга тегишли дўкон пештахтаси харидорлар билан тўла. Бир донаси 2000 вон (тахминан 1,70 доллар) турадиган ширинликлар учун одамлар навбатда туришади. Баъзан навбат 5-6 соатгача боради, чунки бу ерга бутун дунёдан минглаб мухлислар ташриф буюради. Ширинлик шакллари орасида соябон ва юлдуздан ташқари, Netflix шарафига N ҳарфли печеньеларни ҳам топиш мумкин.
Урушдан кейинги қашшоқликдан глобал муваффақиятгача
Далгона шунчаки ширинлик эмас. Бу барча нарсалар аввали бошқача бўлган давр — қашшоқлик, гаджет ва смартфонларсиз ўтган болалик, оддий нарсалардан ҳам катта қувонч туюлган вақтга ишора. Лим ва Чон жуфтлиги 1997 йилги иқтисодий инқироз пайтида аввалги устахонасини ёпгандан кейин далгона пиширишни бошлаган. Печенье сотиш ғояси уларни сақлаб қолган — аввалига бизнес сифатида, энди эса бутун дунё бўйлаб сенсация сифатида уларга омад келтирган. “Калмар ўйини” сериали эса нафақат омон қолиш, балки мамлакатнинг ўтмиши ҳақида ҳам маълумот беради.
Изоҳ (0)