“Калмар ўйини”: сериал ижодкорлари иккинчи мавсумда жавобсиз қолдирган 8 та савол

“Калмар ўйини”нинг иккинчи мавсумидан кейин томошабинларда жуда кўп саволлар туғилмоқда. Улардан энг қизиқарлиларини эътиборингизга ҳавола қиламиз.

Қўзғолон бостирилгандан сўнг ўйин давом этадими?

Биринчи мавсумдан фарқли ўлароқ, иккинчи мавсумда ўйинни охиригача кўролмаймиз — учинчи босқичдан кейин Ки Хун бир нечта тарафдорларини қўриқчиларга ҳужум қилишга ва юқори қаватга чиқиш учун ташаббусни қўлга олишга ундайди. Бу исёнда унча кўп одам иштирок этмайди, тирик қолган ўйинчиларнинг аксарияти катта залда қолади — бинода тартиб ўрнатилгач, улар ўйинни давом эттириши мумкин. Натижада қўзғолонда ҳалок бўлганлар шунчаки ҳисобга пул қўшади. Қизиғи шундаки, иккинчи мавсумда бир вақтнинг ўзида бир нечта ўйинчининг ғалаба қозониш имконияти ҳақида айтилади — балки ўйинни чиндан ҳам тўхтатишар ёки мусобақалар давом этармикан?

388-рақамли ўйинчида қандай сир бор?

Иккинчи мавсумга кўплаб янги қаҳрамонлар қўшилди, аммо улар орасида ҳақиқатан ҳам қизиқарли бўлганлари ўнтадан ошмайди. Иштирокчилар орасида 388-рақамли ўйинчи Кан Де Хо алоҳида ажралиб туради, у ниманидир яшираётганга ўхшайди. Дастлаб у ўзини собиқ ҳарбий деб таништиради, сўзининг исботи сифатида денгиз пиёдаси татуировкасини кўрсатиб, 390-рақамли ўйинчи Ки Хуннинг эски дўсти Пак Чон Бени ишонтиради. Бироқ аста-секин Де Хонинг ёлғон гапиргани маълум бўлади — у қурол ишлата олмайди, жанг майдонида қўрқоқлик қилади, финалда ўртоқларига хиёнат қилади. Учинчи мавсумда бу қаҳрамоннинг аслида кимлигини билиш вақти келади.

Шаман аёлнинг қарғиши амалга ошадими?

Яна бир қизиқарли янги қаҳрамон — 04 рақамли ўйинчи Сон Не, ўзини шаман деб атайди, доимий равишда осмон ва ер худоларидан ёрдам сўрайди. Кўринишидан, у жуда шафқатсиз ва худбин аёл. Аёл ўзини ҳар қандай фалокатлардан ҳимояланган деб ҳисоблайди, лекин бошқаларни осонгина лаънатлайди ва бошқа ўйинчиларга азобда ўлишни башорат қилади. Кино ижодкорлари бу ўйинчини шунчаки қўшишмаган — шаман аёл ҳали ўзини кўрсатиши керак. Энг хавотирли томони шундаки, Сон Не ўйинчилар орасидан ўзига ишонганларини осонликча топади — унинг кичик тўдаси армияга айланиши мумкин.

Капитан Пак кимга ишлайди?

Биринчи мавсумда Хван Чун Хо оролдаги отишмадан кейин тирик қолади — уни Пак исмли балиқчилик кемасининг капитани қутқаради. Полициячи оролни топиш ниятидан воз кечмайди, бунда унга капитан Пак ёрдам беради, аммо финалда денгизчини қандайдир ташқи кучлар бошқараётганини кўрамиз — у қидирув гуруҳининг дронини ишдан чиқаради ва бунга тасодифан гувоҳ бўлган гуруҳ аъзосини денгизга ташлаб юборади. Эҳтимол, капитан собиқ бошловчи, ҳозирда 001 рақамли ўйинчи бўлган Хван Ин Хога ишлар. Чун Хо Ин Хонинг укаси бўлиб, Ин Хо капитандан уни ўйиндан узоқроқ тутишни сўраган бўлиши мумкин. 

Кан Но Ил қандай ўйин ўйнаяпти?

Иккинчи мавсумнинг энг қизиқарли сюжет чизиқларидан бири — Шимолий Кореядан қочиб келган Кан Но Илнинг ўйиндаги қўриқчиларга қўшилиши. Ёш аёлни фақат пул қизиқтиради — у бир пайтлар тортиб олинган фарзандини излаяпти, бироқ шу билан бирга у ўйинда ҳам бузғунчилик қилиб, мурдаларнинг ўғирланишига тўсқинлик қилмоқда. Но Ил 246-рақамли ўйинчи Кен Сокни асраб қолишга уриняпти, аммо у тез орада ҳалок бўлади. Бу ўлим шимолий кореялик мерганнинг хатти-ҳаракатини ўзгартирадими? У Ки Хун бошчилигидаги қаршилик ҳаракатининг бир қисмига айланадими? Охир-оқибат фарзандини топа оладими? Шунча қотиллик содир этганидан кейин кечирилармикан?

Ки Хуннинг қизини яна кўрамизми?

Биринчи мавсумда сериалнинг кўплаб саҳналари Ки Хуннинг кичик қизига бағишланган эди — аслида айнан қизи учун эркак хавфли ўйинга қўшилади. Янги қисмда қиз деярли тилга олинмайди — қаҳрамон ўзини ўйин ташкилотчиларини излашга бағишлаган. Иккинчи мавсум давомида Ки Хун унга фақат бир марта қўнғироқ қилади, лекин гапиришга журъат этолмайди. Бироқ қизи унинг учун ҳали ҳам қадрли, эҳтимол, қизча сериалнинг учинчи мавсумида муҳим рол ўйнар.

Ўйин ташкилотчилари қанчалик қудратли?

Албатта, учинчи мавсум финалида яхши хотимага умид қиламиз, аммо очиғини айтганда, Ки Хун ва ўйин ташкилотчилари ўртасидаги кучлар тенг эмас. Ўйин ортида турган ҳамжамият етарлича кучли ва уюшган бўлиб, ғолибларни тери остига жойлаштирилган чип орқали кузатади — улар капитан Пакни сотиб олади, ўлдирилганларнинг органларини ҳеч қандай хавф-хатарсиз сотишга мажбур қилади. Чун Хони яширган, кейин ишдан бўшатган полиция бошлиғи ҳам махфий компанияда ишлаётганига шубҳа бор. Бир киши бу тизимни барбод қила оладими? Бошқа фильм ва сериалларда ҳам шундай бўлган, лекин ўйин ташкилотчилари биргина Ки Хун учун жуда кучли эмасмикан?

Иккинчи мавсум титрларидан кейинги кадрда нима содир бўлади?

Титрлардан кейинги қисқа кадрда муаллифлар воқеа нима билан давом этишига кичик ишора беради — бу эпизодда бир нечта ўйинчилар “Секинроқ юрсанг, давом этасан” ўйини майдонига жуда ўхшаш жойга чиқадилар. Дарвоқе, бу ерда ҳаракат датчиги билан қоидабузарларни кузатадиган битта қўғирчоқ ёнида иккинчиси ҳам бор. Бу ўйиннинг кейинги босқичига ишора бўладими ёки йўқми, номаълум. Эҳтимол, бу исёндан кейинги ўйиннинг қўшимча датчик билан кучайтирилган давомидир. Учинчи мавсумни кутамиз...

Бунда ҳаммани фақат бир нарса қувонтиради — учинчи мавсум, афтидан, аллақачон тайёр, унинг премераси ёзда бўлиши кутилмоқда. Шунда барча саволларга жавоб берилади. Нима бўлганда ҳам “Калмар ўйини” муаллифлари оммани яна ўзига жалб қилишнинг уддасидан чиқди, улар томошабинларни болаларнинг ғалати ўйинлари ҳақида гапиришга, фақат рақамларига кўра фарқ қиладиган одамлар учун қайғуришга мажбур қилиш йўлини топишди. Бу ҳар қандай мақтовга арзийдиган катта ютуқ.