26 декабрь куни Netflix’да икки йил олдин бутун дунёда шов-шувга айланган Жанубий Кореянинг “Калмар ўйини” сериалининг иккинчи мавсуми намойиш этилди. Мазкур сериални кўрган бўлсангиз, шундай сюжетга эга бир нечта фильмларни томоша қилишни тавсия қиламиз.
“Ҳаёт-мамот ўйинлари”
- 2012 йил
- Ролларда: Женнифер Лоуренс, Дональд Сазерленд, Жош Ҳатчерсон, Стенли Туччи
Ёзувчи Сюзан Коллинзнинг худди шу номдаги китоблар сериясига асосланган ҳаёт-мамот ўйинлари ҳақидаги ёрқин франшиза. Келажакда тоталитар давлат ҳар йили ўйин-кулги учун оммага “Ҳаёт-мамот ўйинлари” ташкил қилади. Бу танлаб олинган ўсмирлар ҳаёт-мамот учун бир-бирига қарши курашадиган ҳалокатли мусобақадир. Синовлар нафақат жисмоний, балки ахлоқий нуқтайи назардан ҳам даҳшатли — омон қолиш учун эса кимнидир ўлдириш керак.
“Қочаётган одам”
- 1987 йил
- Ролларда: Арнольд Шварценеггер, Ричард Доусон
Стивен Кинг асарига асосланган афсонавий фантастик триллер. Унда ўз ихтиёрига қарши танланган маҳбуслар оғир синовлардан ўтиши керак. Ғолиб бўлган озодликка эришади, мағлуб эса телевидение томошабинлари кўз ўнгида таъқиб қилаётган каллакесарлар қўлида ҳалок бўлади. Бир куни иштирокчилар орасида қуролсиз оч одамларни отишдан бош тортган полициячи Бен Ричардс пайдо бўлади. Энди у ҳам ўлим билан телбаларча пойгага киришади.
“Қироллик жанги”
- 2000 йил
- Ролларда: Такеши Китано, Тацуя Фудзивара, Аки Маэда
2000 йил бошларида япон киноижодкорлари садист мактаб ўқувчилари орасида ҳаёт-мамот ўйинлари ҳақидаги қўрқинчли фильмни намойиш қилди. “Қироллик жанги” — ҳукумат томонидан рухсат этилган шафқатсиз ўйин бўлиб, ўрта мактаб ўқувчилари йўқ қилиш таҳдиди остида унда қатнашишга мажбур бўлади. Ўйин қоидаларига кўра, кимсасиз оролда ўспиринлар уч кун давомида турли буюм ва қуроллар ёрдамида бир-бирларини шафқатсизларча йўқ қилади. Оролдан фақат бир киши тирик қайтиши мумкин, шу сабаб қатъий ва шафқатсизларча ҳаракат қилишга тўғри келади.
“Алиса чегара ортида”
- 2020—2022 йиллар
- Ролларда: Кенто Ямадзаки, Тао Сутиа, Нидзиро Мураками
Бутун Осиё ва бошқа давлатларда ҳам машҳур бўлган яна бир ҳайратланарли фильм. Ишсиз, қимор ўйинларига муккасидан кетган Рехей Арису отаси ва укаси билан жанжаллашиб, уйдан чиқиб кетади ҳамда икки дўсти билан учрашади. Тасодифан бу учовлон янги воқеликдан огоҳлантирувчи даҳшатли ва ғалати салютнинг гувоҳи бўлишади. Кейин улар Токионинг кимсасиз жойига тушиб қолишади ва омон қолиш учун шафқатсиз ўйинларда қатнашишлари керак бўлади. Ютқазганларни ўлим кутмоқда, ғолибларга эса уларнинг умрини бир неча кунга узайтирадиган махсус чипталар берилади.
“Интакто”
- 2001 йил
- Ролларда: Леонардо Сбараля, Макс фон Сюдов, Эусебио Понсела, Моника Лопес
“28 ҳафта ўтгач” режиссёри Хуан Карлос Фреснадилодан унча машҳур бўлмаган испан триллери. Бу — тақдир билан курашда ўзининг енгилмаслигини англаган қаҳрамонлар ҳақидаги ҳикоя. Ҳатто фавқулодда омаднинг ҳам чегараси бор, Томас — самолёт ҳалокатидан ёлғиз омон қолган ўғри. Федерико эса даҳшатли зилзиладан омон қолади, шундан сўнг у одамларнинг омадини ўғирлаш қобилияти борлигини билиб қолади. Қаҳрамонлар тақдирнинг яширин ва хавфли ўйинларига киришади, улардан ғолиб бўлгани кекса Сем (Макс фон Сюдов) билан якуний жангда тўқнаш келади. Финалчи у билан рус рулеткасини ўйнаши керак, аммо 20 йилдан бери ҳеч ким Сэмюэлни ўлдира олмайди, чунки унинг ноёб қобилияти бор — у ўз ҳаётини йўқотмаган ҳолда бошқаларнинг ҳаётини ўғирлаши мумкин.
“Куб”
- 1997 йил
- Ролларда: Никол де Бур, Никки Гуадани, Девид Ҳьюлетт
Режиссёр Винченсо Наталининг машҳур жумбоқли картинаси. Шу билан бирга, лойиҳада асосий сюжетдан ташқари, сюжет ости ва қўшимча жумбоқлар мавжуд. Масалан, қаҳрамонларнинг исми бутун дунёдаги энг қаттиқ режимли қамоқхоналар номига ишора қилади, қаҳрамонлар характери эса улар номи билан аталган жазони ижро этиш муассасаларининг ички тартибларини акс эттиради. Воқеалар ривожига кўра, бир гуруҳ нотаниш одамлар номаълум тарзда ғалати куб шаклидаги хонада пайдо бўлади, унинг ҳар бир томони аввалгисига ўхшаш бошқа хонага олиб борадиган люк билан жиҳозланган. Улар ўртасидаги ягона фарқ — ранги ва уларда яширинган ҳалокатли тузоқларнинг хилма-хиллигида. Биргаликдаги саъй-ҳаракатлар билан қаҳрамонлар ўз ҳаётини сақлаб қолиш учун ташқарига чиқиш йўлини топишга ҳаракат қилишади.
“Ҳаёт-мамот ўйинлари 2”
- 2012 йил
- Ролларда: Amanda Сайфред, Женнифер Карпентер, Себастьян Стен, Даниэль Сунжата
Икки фаслдан иборат “Ҳаёт-мамот ўйинлари” сериалининг иккинчи қисмига кўра, шоуга танланган 16 иштирокчи бир миллион евро учун ёввойи Сибир тайгасида кураш олиб боришади. Қоидалар оддий: юзлаб километр масофада ҳеч қандай озиқ-овқат, шахсий буюмлар, электр, алоқа ва цивилизация йўқ. Ким манзилга етса, ўша ғолиб бўлади. Аммо кўрсатув тўсатдан омон қолиш учун ҳалокатли ўйинга айланади, унда энг кучли эмас, балки энг чидамли, сезгир ва айёр ғалаба қозонади.
“Ваҳима”
- 2021 йил
- Ролларда: Майк Фейст, Оливия Скотт Уэлш, Рей Николсон
Техаснинг кичик шаҳарчасида 23 нафар мактаб битирувчиси “Ваҳима” номли ўйинда иштирок этади. Икки сирли ҳакам мусобақани уюштиради ва совринга 50 минг доллар, бундан ташқари ушбу хавф-хатарга тўла шаҳардан чиқиб кетиш имконияти берилади. Бироқ орзу қилинган ғалаба яқинлашгандек туюлган сари маккор ҳакамлар ўйинни янада чидаб бўлмас ва хавфли қилиш учун қоидаларни ўзгартиради.
“Harper ороли”
- 2009 йил
- Ролларда: Жим Бивер, Элейн Кессиди, Кристофер Горам
Агата Кристининг “10 та негр боласи” руҳидаги Америка мини-сериали. Генри ва Тришнинг тўйини нишонлаш учун уларнинг дўстлари ва қариндошлари Harper оролига боришади. Орол дунёдан узилиб қолган ва етти йил муқаддам қўлга тушмаган қотил у ерда ишлагани билан машҳур. Аммо, афтидан, аввалги даҳшат қайта жонлангандек — қаҳрамонлар етиб келиши билан бирин-кетин ҳалок бўла бошлайди. Улар тушунмайди: бу қонхўр жиноятчининг ишими ёки меҳмонлардан бирининг? Оролдан қочиб кетишнинг иложи йўқ, фақат ўзингга ишонишинг мумкин, чунки қотил сен ўйлагандан кўра яқинроқда. Шундай қилиб, 25 нафар гумонланувчи 13 кун давомида қутулиб кетишга ва бир вақтнинг ўзида қотилни аниқлашга ҳаракат қилишади.
“Боши берк кўча”
- 2008 йил
- Ролларда: Риз Аҳмад, Энди Найман, Жейми Уинстон
Икки ой давомида “Катта ака” реалити-шоуси иштирокчилари уларнинг ҳар бир ҳаракатини кузатадиган кўплаб камералар билан тўла махсус уйда ижтимоий изоляцияда бўлишади. Аммо қаҳрамонларнинг изоляцияси уларни дунёнинг қолган қисмидан бутунлай ажратиб қўяди, шунда тўсатдан одамларни зомбиларга айлантирадиган ғалати эпидемия пайдо бўлади. Содир бўлган воқеадан хабар топган қаҳрамонлар озодликда қандай синовлар кутаётганини тасаввур ҳам қилмасдан, ташқарига чиқишга ҳаракат қилишади. “Боши берк кўча” мини-сериали кинояли сатирик комедия сифатида бошланадиган ва аста-секин ҳаёт-мамот ҳақидаги триллер-лабиринтга айланадиган кескин жанрдаги фильм.
“Офис тажрибаси”
- 2017 йил
- Ролларда: Жон К. Макгинли, Адриа Арҳона, Жон Галлаҳер, Тони Голдуин
Кимдир томонидан ўйлаб топилган ижтимоий тажрибада йирик корпорациянинг 80 нафар ходимидан иборат гуруҳ Богота (Колумбия)даги кўп қаватли корпоратив офис биносида қамалиб қолади. Компаниянинг ички телефон алоқаси орқали номаълум овоз уларни қийин танлов олдида қўяди: “Ўлдир ёки ўзинг ўласан”. Саросимага тушган қаҳрамонлар ўйлашга вақт йўқлигини тезда тушунади ва ақл бовар қилмайдиган қон тўкилиши бошланади. Фильмда асоссиз зўравонлик ва ҳаддан ташқари қонли эпизодлар кўп. Аммо шу билан бирга, у корпоратив соҳа ҳалокатли бўлиши мумкинлигига очиқдан-очиқ ишора қилиб, офис сатираси ҳудудига ҳам киришга муваффақ бўлади.
“Call-марказ”
- 2020 йил
- Ролларда: Павел Табаков, Юлия Хлинина, Владимир Яглич, Сабина Ахмедова
Москва. Бизнес-марказнинг 12-қаватида интернет-дўконнинг Call-маркази офиси жойлашган. Бир куни эрталаб 12 нафар ходим ишга келиб, хонада бомба борлигини билиб қолишади. Монитор экранларидан ўзини Ота ва Она деб таништирган номаълум одамларнинг овозлари агар гаровдагилар уларнинг кўрсатмаларини бажаришга рози бўлмаса, исталган пайтда бомбани портлатиш билан таҳдид қилади. Натижада қаҳрамонлар кўринмас бошқарувчиларнинг кўрсатмаларини бажаришлари ва бир-бирлари ҳақидаги энг даҳшатли сирларни билиб олишлари керак бўлади. Қаҳрамонларнинг азоб-уқубатларини кузатиш нақадар қўрқинчли бўлмасин, воқеалар ривожи томошабинни экранга михлаб қўяди.
Изоҳ (0)