Netflix platformasida “Kalmar o‘yini” seriali namoyish etilganidan keyin loyiha mazkur striming tizimi tarixidagi eng mashhur shoulardan biri bo‘ldi. U seriallar reytingi rekordlarini yangiladi va global pop madaniyatining bir qismiga aylandi. Ammo kim o‘ylabdiki, serialning eng ko‘p muhokama qilinadigan qahramonlaridan biri... shakarli pechenye bo‘ladi deb?
Dalgona nomli ushbu an’anaviy koreys shirinligi to‘satdan butun dunyoga mashhur bo‘ldi. Millionlab tomoshabinlar bu shirinlik o‘zi nima uchun mashhur serialga tushib qolgani haqida turli savollar bera boshladi.
Oddiy shirinlik yangicha talqinda
Dalgona – Koreyada uzoq yillardan beri mashhur bo‘lgan an’anaviy shirinlik bo‘lib, uning tarkibi juda oddiy: shakar va soda. Lekin “Kalmar o‘yini” serialida u bolalikdagi o‘yindan ko‘ra ko‘proq narsani anglatardi. Ishtirokchilar pechenyedagi belgilangan shaklni buzmasdan kesib olishlari kerak edi. Aks holda, ular o‘yindan chiqarilardi — ya’ni hayotdan mahrum bo‘lishardi.
Aslida, dalgona shirinligi Janubiy Koreyaning urush davridagi eng ko‘p sotilgan pechenye edi. 60-yillarda bolalar uchun shokolad yoki muzqaymoq kabi qandolat mahsulotlari yo‘q edi, dalgona esa arzon narxga pullanar va ko‘pincha maktablar tashqarisidagi kichik rastalarda sotilar edi. O‘sha davrda ham xuddi shunday o‘yin bo‘lgan: agar pechenyedagi shaklni sindirmay ajrata olsangiz, ikkinchisi bepul berilar edi.
Serial rejissyori Xvan Dong Xyok ham o‘sha davrdagi kambag‘al Seulda o‘sgan va ko‘pincha shirinlik o‘yinida doim g‘alaba qozongan. Murakkab shakllarni kesib olish uchun u ignani olov bilan qizdirgan va shirinlikni yumshoqroq qilish uchun pechenyeni yalagan. “Kalmar o‘yini”da ham qahramonlar qandli shirinlikdan soyabonlar, yulduzlar va uchburchaklarni ajratishga harakat qiladi.
Haqiqiy ustalar tomonidan tayyorlangan shirinliklar
Ushbu sahnani suratga olish uchun ijodkorlar haqiqiy oshpazlar — Lim Chang Chju va uning rafiqasi Chon Chjon Sunni taklif qilishgan. Er-xotin ko‘p yillardan beri Seuldagi do‘konda dalgona tayyorlab sotadi. Ularga uch kun ichida 400 dan ortiq pechenye pishirish vazifasi yuklatilgan.
Hozirda ularga tegishli do‘kon peshtaxtasi xaridorlar bilan to‘la. Bir donasi 2000 von (taxminan 1,70 dollar) turadigan shirinliklar uchun odamlar navbatda turishadi. Ba’zan navbat 5-6 soatgacha boradi, chunki bu yerga butun dunyodan minglab muxlislar tashrif buyuradi. Shirinlik shakllari orasida soyabon va yulduzdan tashqari, Netflix sharafiga N harfli pechenyelarni ham topish mumkin.
Urushdan keyingi qashshoqlikdan global muvaffaqiyatgacha
Dalgona shunchaki shirinlik emas. Bu barcha narsalar avvali boshqacha bo‘lgan davr — qashshoqlik, gadjet va smartfonlarsiz o‘tgan bolalik, oddiy narsalardan ham katta quvonch tuyulgan vaqtga ishora. Lim va Chon juftligi 1997-yilgi iqtisodiy inqiroz paytida avvalgi ustaxonasini yopgandan keyin dalgona pishirishni boshlagan. Pechenye sotish g‘oyasi ularni saqlab qolgan — avvaliga biznes sifatida, endi esa butun dunyo bo‘ylab sensatsiya sifatida ularga omad keltirgan. “Kalmar o‘yini” seriali esa nafaqat omon qolish, balki mamlakatning o‘tmishi haqida ham ma’lumot beradi.
Izoh (0)