“Калмар ўйини” сериалининг иккинчи мавсуми премерасидан сўнг 11 кун ичида 126,2 миллиондан ортиқ марта томоша қилинди. Қисқа муддатда бундай юқори натижага ҳали ҳеч қайси Netflix сериали эриша олмаган.
Шоунинг давоми Netflix’нинг энг машҳур инглиз тилида бўлмаган сериаллари рейтингида иккинчи ўринни эгаллаган. Мазкур рейтингда фақатгина “Калмар ўйини” нинг биринчи мавсуми етакчилик қилмоқда. Мазкур сериал илк бор чиққандан кейин 91 кун ичида 265 миллион марта томоша қилинган. Тахминларга кўра, иккинчи мавсум ушбу рекордни янгилаб, биринчисини ортда қолдириши мумкин.
Netflix онлайн кинотеатрининг энг кўп томоша қилинган сериаллари умумий рўйхатида (бу ерда инглиз тилидаги лойиҳалар ҳам инобатга олинган) “Калмар ўйини”нинг иккинчи мавсуми тўртинчи ўринни эгаллаган. Учинчи ўринни сериалнинг биринчи мавсуми, иккинчи ўринни “Уэнздай”, етакчиликни эса “Ажабтовур ишлар”нинг тўртинчи мавсуми олган.
Жанубий Кореяда суратга олинган мазкур сериалнинг иккинчи мавсуми 2024 йил 26 декабрь куни Netflix’да тақдим этилди. Шоу Rotten Tomatoes платформасида танқидчилар томонидан 83%, томошабинлар томонидан эса 63% ижобий баҳоланди. 8 январь куни Netflix учинчи мавсумга оид биринчи премерани намойиш қилди:
Учинчи мавсум сериал учун охиргиси бўлади. Премьера 2025 йилда бўлиб ўтади.
Изоҳ (0)