“Калмар ўйини”нинг иккинчи мавсуми аллақачон турли рейтингларни забт этиб, томошабинлар олқишига сазовор бўлди. Бироқ ҳар қандай сиквел каби у ҳам танқидлардан қочиб қутулмади. Аммо мавсумнинг қандай яратилганини билганингиздан сўнг, у ҳақидаги фикрингиз ўзгаради.
Ҳаммасига олти ой, ёки Хван Дон Хек қандай мўжиза яратди?
Тасаввур қилинг: бутун дунёни забт этган сериалнинг давомини ўйлаб топиш, ёзиш ва суратга олишга тайёрланиш учун атиги олти ой вақтингиз бор. “Калмар ўйини” режиссёри ва сценарий муаллифи Хван Дон Хек айнан шундай вазиятга дуч келди.
Биринчи мавсумнинг муваффақияти бир вақтнинг ўзида ҳам омад, ҳам синов бўлди. Netflix қатъий муддат белгилади, Хван эса бошқа муаллифларни жалб этишдан воз кечиб, барча эпизодларни ўзи ёзишга аҳд қилди. У ҳатто биринчи мавсумни машҳур қилган ўша атмосферани сақлаш учун иккинчи мавсумга ҳам ўзи режиссёрлик қилди. Айтганча, бу каби кўламдаги шоу учун бундай ҳолат жуда камдан-кам учрайди.
Пинҳоний ёвузлар
Сирли ўйинга таклиф қилувчи ролини ижро этган Кон Ю “Калмар ўйини”га қадар ҳеч қачон салбий қаҳрамонларни ўйнамаганини билармидингиз? Актёр 20 йиллик фаолияти давомида бундай образлардан ўзини олиб қочган. Унинг совуққонлиги ва назокатли услуби ҳар бир саҳнага алоҳида таранглик бахш этади.
Бундан ташқари, Фронтмен ролини ўйнаган актёр Ли Бен Хон суратга олиш учун чап қўлидан фойдаланишни ўрганиши керак эди. Лининг ўзи ўнгақай, чапақайлик у учун ҳақиқий синов бўлди. Шундай экан, агар Фронтманнинг ғайритабиий ҳаракатланаётганини кўрсангиз, билингки, бу хато эмас, балки қаҳрамон характерининг бир қисми.
Мини-ўйинлар: ҳар сониядаги босим
Иккинчи мавсум ўйинларнинг хилма-хиллиги билан ҳайратда қолдиради. Улардан бирида актёр Кан Ха Нилга гонги ўйнашни ўрганишга тўғри келди. Машғулот соатларига қарамай, финал саҳнаси барибир профессионал иштирокни талаб қилди.
Ттакчи ўйнаган Чо Юри эса янада кўпроқ қийинчиликни бошдан кечирди. Унинг қаҳрамонини улоқтириш саҳнаси экранда мукаммал кўринади, лекин унинг ортида ўнлаб муваффақиятсиз дубллар бўлган. Натижада ижодкорлар кадр ишонарли чиқиши учун компьютер графикасидан фойдаланишди.
Иккинчи мавсум — бу фақат бошланиши
Сценарий муаллифи дастлаб иккинчи мавсумни ҳикоянинг биринчи ярми сифатида ўйлаган. Мавсум финали жавоблардан кўра кўпроқ саволлар қолдиради, аммо бу келажакдаги серияларга қизиқишни кучайтиради. Хван Дон Хекнинг ўзи томошабинлар ҳақиқий якунни фақат учинчи мавсумда кўришини таъкидлайди.
Айнан шунинг учун ҳам фильмнинг тугашини кутган хейтерлар ўзларини алданган деб ҳис қилишади. Аммо агар иккинчи мавсумга улкан жумбоқнинг бир қисми сифатида қарасангиз, ҳаммаси тушунарли: бу ерда ҳамма нарса режага мувофиқ кетмоқда.
Кутилмалар ва реаллик
“Калмар ўйини”нинг иккинчи мавсуми кўплаб баҳсларга сабаб бўлмоқда. Сериалнинг кучи ҳам шунда: у ҳар қандай томошабинни ўйлашга, баҳслашишга ва қаҳрамонлар билан бирга яшашга мажбур қилади.
Изоҳ (0)