Financial Times нашри манбаларига кўра, миллиардер Илон Маск 2029 йилда бўлиб ўтадиган навбатдаги сайловларгача Британия лейбористлар партияси етакчиси Кир Стармерни лавозимидан четлатмоқчи.
Унгача Маск ўзининг Х ижтимоий тармоғидаги тажовузкор постларидан ташқари, амалий ҳаракатларга ўтиб, Британия ҳукуматини “беқарорлаштириш” ниятида, дейилади Financial Times’даги мақолада.
“Илон Маск Ғарб цивилизациясининг ўзи хавф остида, деб ҳисоблайди”, деди манбалардан бири газетага.
Маск, шунингдек, британиялик ўта ўнгчилар ёрдамини олиш йўлларини қидирмоқда. Хусусан, уни “Реформ УК” партияси қизиқтиряпти. Партия етакчиси Найжел Фараж Brexit ғояси муаллифларидан бири сифатида машҳур.
Ўтган ҳафта Илон Маск аввал бош прокурор бўлиб ишлаган Кир Стармерни Буюк Британияда жиноий гуруҳлар томонидан қизларга нисбатан қилинган жинсий зўравонликларни яширганликда айблаганди.
Унинг фикрича, ҳокимиятдаги лейбористлар қизларга нисбатан жиноятлар Осиё давлатларидан келган одамлар томонидан содир этилганлигини яширган. Стармер айбловларни рад этади.
Бундан ташқари, Маск Найжел Фаражга ҳам қарши чиқди — у “Реформ УК” партиясига янги раҳбар кераклигини айтди. Маскнинг фикрича, Фараж партияни бошқариш учун “керакли фазилатларга эга эмас”.
Найжел Фараж Илон Маскнинг ўзи ҳақидаги сўзларига изоҳ бериб, “ҳеч қачон принципларидан воз кечмаслиги”ни айтганди.
Изоҳ (0)